మంత్రి దామోదరకు బిగ్ టాస్క్..!

• మెదక్ లోక్ సభ ఎలక్షన్ కోఆర్డినేటర్ బాధ్యతలు
• అసెంబ్లీ ఎన్నికల్లో ఆరు చోట్ల బీఆర్ఎస్​ గెలుపు 
• కాంగ్రెస్​ గెలవాలంటే కష్టపడాల్సిందే 

మెదక్, సంగారెడ్డి, సిద్దిపేట, వెలుగు: ఇటీవల జరిగిన అసెంబ్లీ ఎన్నికల్లో ఘన విజయం సాధించి ప్రభుత్వాన్ని ఏర్పాటు చేసిన కాంగ్రెస్​ వచ్చే పార్లమెంట్ ఎన్నికల్లో మెజారిటీ లోక్​సభ స్థానాలు కైవసం చేసుకోవాలని ఆశిస్తోంది. ఈ మేరకు ఇప్పటి నుంచే ఎన్నికలపై ఫోకస్​ పెట్టింది. రాష్ట్రంలోని అన్ని లోక్ సభ నియోజక వర్గాలకు కో ఆర్డినేటర్లను నియమించింది. 

ఇందులో భాగంగా మెదక్ లోక్​సభ నియోజక వర్గానికి వైద్య ఆరోగ్య శాఖ మంత్రి దామోదర రాజనర్సింహాను కో ఆర్డినేటర్ గా నియమించింది. కాగా ఇటీవల జరిగిన అసెంబ్లీ ఎన్నికల్లో మెదక్ లోక్ సభ నియోజక వర్గంలో 6 చోట్ల బీఆర్ఎస్ అభ్యర్థులు గెలుపొందగా, కేవలం ఒక్క మెదక్ అసెంబ్లీ స్థానంలో మాత్రమే కాంగ్రెస్ గెలిచింది. ఈ నేపథ్యంలో రానున్న లోక్​సభ ఎన్నికల్లో కాంగ్రెస్ గెలుపు దామోదరకు బిగ్ టాస్క్ కానుంది. 

25 ఏళ్ల తర్వాత..

రెండున్నర దశాబ్దాల కాలంగా  బీజేపీ, బీఆర్ఎస్ పార్టీలు పట్టు బిగించి వరుస విజయాలతో మెదక్  లోక్​సభ స్థానంలో పాగా వేశాయి.1998లో జరిగిన పార్లమెంట్ ఎన్నికల్లో దివంగత కాంగ్రెస్ సీనియర్ నేత ఎం. బాగారెడ్డి ఎంపీగా గెలుపొందగా ఆ తర్వాత మళ్లీ ఇప్పటి వరకు కాంగ్రెస్​ గెలవలేదు. 2009 ఎన్నికల్లో టీఆర్ఎస్ అభ్యర్థిగా పోటీచేసిన విజయశాంతి ఎంపీగా గెలుపొందారు. 2014 ఎన్నికల్లో టీఆర్ఎస్​అధినేత కేసీఆర్, 2019లో అదే పార్టీకి చెందిన కొత్త ప్రభాకర్ రెడ్డి ఎంపీగా గెలుపొందారు. తద్వారా మెదక్ స్థానాన్ని బీఆర్ఎస్ పార్టీ కంచుకోటగా మార్చుకుంది. 

హస్తం పార్టీ ప్రత్యేక దృష్టి

తాజాగా రేవంత్ రెడ్డి నేతృత్వంలో రాష్ట్రంలో అధికారంలోకి వచ్చిన కాంగ్రెస్​మెదక్ లోక్ సభ స్థానంపై ప్రత్యేక దృష్టి సారించింది. ఈ మేరకు ఉమ్మడి జిల్లా నుంచి ప్రాతినిధ్యం వహిస్తున్న మంత్రి దామోదర రాజనర్సింహాకు మెదక్​లోక్​సభ స్థానంలో కాంగ్రెస్​పార్టీని గెలిపించే బాధ్యతలు అప్పగించింది. లోక్​సభ నియోజకవర్గ పరిధిలో మొత్తం 7 అసెంబ్లీ సెగ్మెంట్లు ఉండగా మొన్నటి అసెంబ్లీ ఎన్నికల్లో 6 చోట్ల సంగారెడ్డి, పటాన్​చెర్, నర్సాపూర్​, గజ్వేల్, దుబ్బాక, సిద్దిపేట బీఆర్ఎస్​ అభ్యర్థులు గెలుపొందగా, కేవలం ఒక్క మెదక్​అసెంబ్లీ స్థానంలో మాత్రమే కాంగ్రెస్​ అభ్యర్థి గెలిచారు.

 మాజీ ముఖ్యమంత్రి కేసీఆర్, మాజీ మంత్రి హరీశ్​ రావు, మెదక్​ మాజీ ఎంపీ కొత్త ప్రభాకర్​రెడ్డి ఎమ్మెల్యేలుగా గెలిచిన గజ్వేల్, సిద్దిపేట, దుబ్బాక అసెంబ్లీ స్థానాల్లో బీఆర్ఎస్​కు, కాంగ్రెస్​కు లభించిన ఓట్లలో భారీ వ్యత్యాసం ఉంది. ఈ నేపథ్యంలో లోక్​సభ ఎన్నికల్లో కాంగ్రెస్ గెలుపు అంత సులువయ్యే పరిస్థితి కనిపించడం లేదు. ఎన్నికల లోపు కాంగ్రెస్​ ప్రభుత్వం హామీ ఇచ్చిన ఆరు గ్యారంటీలు అమలులోకి వస్తే ఓటర్లలో మార్పు వచ్చి కాంగ్రెస్​కు అనుకూల వాతావరణం ఏర్పడే అవకాశం ఉందని రాజకీయ విశ్లేషకులు భావిస్తున్నారు. 

కలిసికట్టుగా పనిచేస్తేనే..   

గడచిన అసెంబ్లీ ఎన్నికల్లో మెజారిటీ స్థానాల్లో ఓటమికి కాంగ్రెస్​ నాయకులందరు కలిసి కట్టుగా పనిచేయకపోవడం, ఓవర్​ కాన్ఫిడెన్స్, కొన్ని చోట్ల నాయకుల మధ్య వర్గ విబేధాలు కారణమన్న అభిప్రాయం ఉంది. ముఖ్యంగా సిట్టింగ్​స్థానమైన సంగారెడ్డిలో ఓటమి చెందడం ఆ పార్టీకి షాక్​ఇచ్చింది. ఈ క్రమంలో లోక్​సభ ఎన్నికల్లో గెలుపొందాలంటే అసెంబ్లీ ఎన్నికల్లో ఓటమికి గల కారణాలను విశ్లేషించుకుని, తదనుగుణంగా లోపాలు సరిదిద్దాలి. 

కాంగ్రెస్​నాయకులందరిని ఏకతాటిమీదకు తీసుకువచ్చి కలిసి కట్టుగా పనిచేసేలా చూస్తే గానీ ఆశించిన ఫలితం దక్కదన్న అభిప్రాయం వ్యక్తమవుతోంది. ఈ క్రమంలో లోక్​సభ నియోజకవర్గ కో ఆర్డినేటర్​గా నియమితులైన మంత్రి దామోదర రాజనర్సింహా ఎన్నికల్లో విజయసాధనకు ఎలాంటి వ్యూహ రచన చేస్తారన్నదానిపై సర్వత్రా ఆసక్తి నెలకొంది.