సంగారెడ్డి, వెలుగు : కాంగ్రెస్ నేతలు వారి 60 ఏండ్ల పాలనలో ఎలాంటి అభివృద్ధి చేయకుండా.. ఇప్పుడు మళ్లీ చాన్స్ ఇస్తే రాష్ట్రాన్ని డెవలప్ చేస్తామని అబద్ధాల డిక్లరేషన్తో వస్తున్నారని మంత్రి హరీశ్రావు విమర్శించారు. అధికార దాహంతో ప్రజలను మభ్యపెట్టేందుకు, మోసపూరిత వాగ్దానాలతో తెలంగాణ బిడ్డలను గోసవెట్టే పనిలో కాంగ్రెస్ నేతలు ఉన్నారని మండిపడ్డారు. శనివారం సంగారెడ్డి జిల్లా కంది, మల్కాపూర్, సంగారెడ్డి, అందోల్లో పలు అభివృద్ధి కార్యక్రమాల్లో మంత్రి పాల్గొన్నారు. ఈ సందర్భంగా ఆయన మాట్లాడుతూ.. కాంగ్రెస్ నాయకుల మాయమాటలు నమ్మొద్దన్నారు. సీఎం కేసీఆర్ రాష్ట్ర అభివృద్ధితో పాటు పేదల సంక్షేమం కోసం పాటుపడుతూ రాష్ట్రాన్ని దేశానికే రోల్ మోడల్గా తయారుచేశారన్నారు. కాంగ్రెస్, బీజేపీ నేతలకు అధికార దాహం తప్ప ప్రజా సంక్షేమం పట్టదన్నారు. ఆ రెండు పార్టీలు ఒకే ఎజెండాతో ఎన్నికలకు సిద్ధమవుతున్నాయని మంత్రి పేర్కొన్నారు. కేసీఆర్ పాలనలో దేశంలో ఎక్కడా లేని విధంగా ఒకేరోజు 9 మెడికల్ కాలేజీలను ప్రాంభించి వైద్యాన్ని అందరికీ అందుబాటులోకి తెచ్చామన్నారు.
ALSO READ: సెప్టెంబర్ 17న ఎగ్జిబిషన్ గ్రౌండ్లో సీపీఐ సభ
ఇస్నాపూర్కు మెట్రో రావాలంటే.. కేసీఆర్ మళ్లీ సీఎం కావాలె
పటాన్చెరు సమీపంలోని ఇస్నాపూర్ ప్రాంతానికి మెట్రో రైలు రావాలంటే కేసీఆర్ మూడో సారి సీఎం కావాల్సిందేనని మంత్రి హరీశ్రావు అన్నారు. మెట్రో రైల్ లైన్ వేయించడం కేవలం కేసీఆర్తోనే సాధ్యమవుతుందన్నారు. పటాన్చెరు మినీ ఇండియాగా పేరు గాంచి అన్ని రాష్ట్రాలు, అన్ని వర్గాల సంస్కృతి, సంప్రదాయాలతో ఇస్నాపూర్ అభివృద్ధి చెందిందన్నారు. ఈ ప్రాంతానికి మెట్రో సేవలు ఎంతో అవసరమని, త్వరలోనే సాధించుకుంటామని మంత్రి ధీమా వ్యక్తం చేశారు. పేద ప్రజల అభివృద్ధే ధ్యేయంగా సీఎం కేసీఆర్ పని చేస్తున్నారని, రాబోయే ఎన్నికల్లో బీఆర్ఎస్ పార్టీని ఆదరించి మూడోసారి అధికారంలోకి తీసుకురావాలని మంత్రి హరీశ్రావు కోరారు. ఈ కార్యక్రమాల్లో పటాన్చెరు, ఆందోల్, నారాయణఖేడ్ఎమ్మెల్యేలు గూడెం మహిపాల్రెడ్డి, క్రాంతికిరణ్, భూపాల్రెడ్డి, ఎమ్మెల్సీ సత్యనారాయణ, చేనేత అభివృద్ధి సంస్థ చైర్మన్, సంగారెడ్డి మాజీ ఎమ్మెల్యే చింతా ప్రభాకర్, కలెక్టర్ శరత్, అడిషనల్ కలెక్టర్ చంద్రశేఖర్ పాల్గొన్నారు.
