యాదాద్రి, వెలుగు: మునుగోడు ఉప ఎన్నికల్లో బీజేపీ గెలిస్తే భూముల ధరలు తగ్గుతయని మంత్రి హరీశ్రావు అన్నారు. ప్రచారంలో భాగంగా యాదాద్రి జిల్లా చౌటుప్పల్ మండలంలో రోడ్ షో నిర్వహించి మాట్లాడారు. ‘పంతంగిలో రూ.లక్షకు ఎకరం భూమి ఉండే. కేసీఆర్పవర్లోకి వచ్చినంక రాష్ట్రంలో భూముల ధరలు పెరిగినయ్. కాళేశ్వరం నీళ్లు రాబోతున్నాయ్. మునుగోడు ఎన్నికల్లో బీజేపీ పొరపాటున గెలిస్తే భూముల ధరలు తగ్గిపోతయి’ అని అన్నారు. టీఆర్ఎస్ అభ్యర్థి కూసుకుంట్ల గెలిస్తే.. హుజూర్నగర్కు ఇచ్చినట్టుగా సీఎం కేసీఆర్ రూ.2 వేల కోట్లు ఇస్తారని హామీ ఇచ్చారు. ఖాళీ జాగాలు ఉన్న వాళ్లకు ఇండ్లు నిర్మించి ఇస్తామని, దీనికి సంబంధించి బడ్జెట్లో నిధులు కేటాయించామన్నారు.
ఎన్నికల కోడ్ అయిపోగానే పల్లె దవాఖానాల్లో డాక్టర్లను నియమిస్తామన్నారు. అందరికీ పింఛన్లు మంజూరు చేయిస్తామన్నారు. దండు మల్కాపురంలో ఏర్పాటు చేసే కంపెనీల్లో స్థానికులకే ఉద్యోగాలు ఇచ్చేలా చర్యలు తీసుకుంటామన్నారు. మహిళలకు అభయహస్తం పైసలు ఇస్తామని, వడ్డీ లేని లోన్లు ఇస్తామన్నారు. మునుగోడును కేటీఆర్ దత్తత తీసుకుంటానని హామీ ఇచ్చిన విషయాన్ని ప్రస్తావిస్తూ కూసుకుంట్ల గెలవగానే.. ఏడాదిలోగా పూర్తి స్థాయిలో అభివృద్ధి చేస్తామని తెలిపారు.
రాజగోపాల్రెడ్డిని గెలిపించండి
మునుగోడు ఎన్నికల్లో రాజగోపాల్రెడ్డిని గెలిపించాలని మంత్రి హరీశ్రావు నోరు జారారు. చౌటుప్పల్మండలం పంతంగికి వచ్చిన ఆయన ప్రెస్మీట్లో మాట్లాడారు. ‘మునుగోడులో మరింత అభివృద్ధి జరగాలంటే రాజగోపాల్రెడ్డి గెలవాలని ప్రజలు కోరుకుంటున్నారు’ అని అన్నారు. ఆ తర్వాత కూడా ఆయన పొరపాటును సరిదిద్దుకోకుండానే మాట్లాడారు. బీజేపీ మ్యానిఫెస్టోపై విమర్శలు గుప్పించారు.
