- పార్లమెంట్ ఎన్నికల తర్వాత బీఆర్ఎస్ పార్టీ భూస్థాపితమే
- తుక్కుగూడ రాహుల్గాంధీ సభ దేశానికి దిశానిర్దేశం
- మల్లు రవి మెజార్టీ 4 లక్షలు దాటేలా పనిచేయాలని పిలుపు
- నాగర్కర్నూల్ పార్లమెంట్ ఎన్నికల సన్నాహక సమావేశం
నాగర్కర్నూల్, వెలుగు : అధికారం పోయిందన్న కడుపు మంటతోనే కాంగ్రెస్ సర్కారుపై కేసీఆర్ ఫ్యామిలీ విమర్శలు చేస్తున్నదని రాష్ట్ర ఎక్సైజ్, టూరిజం శాఖ మంత్రి జూపల్లి కృష్ణారావు ఫైర్ అయ్యారు. ‘పదేండ్లు ప్రగతిభవన్లో పడుకున్న కేసీఆర్, కరువు వచ్చినా.. వరదలు వచ్చినా.. పిడుగులు పడినా ఏనాడూ బయటకు రాలే. రైతుల గురించి పట్టించుకోలే.. కానీ కాంగ్రెస్ అధికారంలోకి వచ్చి మూడు నెలలు కూడా కాకముందే రైతు పరామర్శల యాత్ర మొదలుపెట్టిండు. వంద ఎలుకలు తిన్న పిల్లి కాశీ యాత్రకు పోయినట్టు కుర్చీ ఊడిపోయిన తర్వాత కేసీఆర్కు రైతుల కష్టాలు గుర్తుకొస్తున్నాయి’ అని ఎద్దేవా చేశారు. పార్లమెంట్ఎన్నికల తర్వాత బీఆర్ఎస్ పార్టీ నామరూపాల్లేకుండా భూస్థాపితం కావడం ఖాయమని అన్నారు.
బుధవారం నాగర్ కర్నూల్ జిల్లా కేంద్రంలో నాగర్ కర్నూల్ పార్లమెంట్ పరిధిలోని ఏడు అసెంబ్లీ నియోజకవర్గాల ముఖ్య కార్యకర్తలతో ఎన్నికల సన్నాహక సమావేశం నిర్వహించారు. ఈ సమావేశానికి హాజరైన మంత్రి జూపల్లి మాట్లాడుతూ.. కరువుకు కాంగ్రెస్సే కారణమని కేసీఆర్, కేటీఆర్, హరీశ్రావు పచ్చి అబద్ధాలు మాట్లాడుతున్నారని, వానాకాలం తర్వాత అధికారంలోకి వచ్చిన కాంగ్రెస్కు, కరువుకు ఏం సంబంధం అని ప్రశ్నించారు. కృష్ణా బేసిన్ నీటిని రాయలసీమకు కట్టబెట్టి, మన పంటలు ఎండబెట్టిన కేసీఆర్.. ఇప్పుడు రైతులపై మొసలి కన్నీరు కారుస్తున్నారని దుయ్యబట్టారు. రేవంత్రెడ్డి ఢిల్లీ పర్యటనలపై కూడా విమర్శలు చేస్తున్నారని అన్నారు. ‘12 సార్లు కాదు.. 30 సార్లు ఢిల్లీకి పోతాం.. సీఎం ఢిల్లీకి పోతే మీకేం కడుపు నొప్పి?’ అని ప్రశ్నించారు.
రాబోయే 40 రోజులు కార్యకర్తలు, నేతలంతా కష్టపడితే మల్లు రవి 4 లక్షల మెజార్టీతో గెలవడం ఖాయమని, ఆయన విజయం కోసం ప్రతి ఒక్కరూ కష్టపడి పనిచేయాలని పిలుపునిచ్చారు. ఎన్నికల్లో కష్టపడ్డ కార్యకర్తలను వచ్చే స్థానిక సంస్థల ఎన్నికల్లో గెలిపించుకునే బాధ్యతను తాము తీసుకుంటామని చెప్పారు. ఐదేండ్లపాటు ఎంపీగా ఉండి పార్లమెంట్ లోపల, బయట నోరు తెరవని రాములుకు బీజేపీలో చేరి తన కొడుకును గెలిపించాలని అడిగే హక్కు లేదన్నారు. కుల, మతాల మీద రాజకీయాలు చేసే బీజేపీని చిత్తుగా ఓడించాలని పిలుపునిచ్చారు. బీఎస్పీలో ఉండగా కేసీఆర్ది గడీల పాలన, అవినీతి పాలన అని తిట్టిపోసిన ఆర్ఎస్ ప్రవీణ్కుమార్.. ఇప్పుడు ఎంపీ టికెట్ కోసం బీఆర్ఎస్లో చేరి, కేసీఆర్పాలనను పొగడటం దురదృష్టకరమన్నారు. ఈ సమావేశంలో కాంగ్రెస్ జిల్లాఅధ్యక్షుడు, ఎమ్మెల్యే డాక్టర్ వంశీకృష్ణ, నాగర్ కర్నూల్, కల్వకుర్తి, వనపర్తి ఎమ్మెల్యేలు రాజేశ్రెడ్డి, నారాయణరెడ్డి, మేఘారెడ్డి, ఎమ్మెల్సీ కూచుకుళ్ల దామోదర్ రెడ్డి , తదితరులు పాల్గొన్నారు.
