హైదరాబాద్: బుల్లెట్ శరీరంలో ఉన్న కూడా పాట ద్వారా అందరినీ సంఘటితం చేసిన గొప్ప వ్యక్తి గద్దరన్న అని మంత్రి జూపల్లి కృష్ణారావు కొనియాడారు. ప్రజాయుద్ధ నౌక గద్దర్ 77వ జయంతి సందర్భంగా హైదరాబాద్ రవీంద్ర భారతిలో భాషా సాంస్కృతిక శాఖ, గద్దర్ ఫౌండేషన్ ఆధ్వర్యంలో జయంతి వేడుక నిర్వహించారు. ఈ కార్యక్రమానికి జూపల్లి అతిథిగా హాజరై ప్రసంగించారు. ప్రత్యేక తెలంగాణ రాష్ట్ర సాధన కోసం గద్దరన్న చేసిన పోరాటం గురించి ఎంత చెప్పిన తక్కువేనని అన్నారు.
తెలంగాణ గర్వించ దగ్గ బిడ్డ గద్ధరన్న అని ప్రశంసించారు. తొలి దశ ఉద్యమం, మలి దశ ఉద్యమంలో తన ఆట, పాటతో ఉర్రుతలూగించారని గుర్తు చేశారు. రాష్ట్ర సాధన కోసం విశేషంగా పోరాడిన గద్దరన్న తెలంగాణ రాష్ట్ర వచ్చాక గత బీఆర్ఎస్ ప్రభుత్వ తీరుతో స్వరాష్ట్రంలో బాధ పడాల్సిన పరిస్థితి వచ్చిందని అన్నారు. బీఆర్ఎస్ ప్రభుత్వ హయాంలో అప్పటి సీఎం కేసీఆర్ను కలిసేందుకు వెళ్లిన గద్దర్ ప్రగతి భవన్ ముందు గంటల కొద్ది వేచి చూసేలా చేశారని మండిపడ్డారు.
Also Read :- కేసీఆర్ పాంహౌస్ లో కుంభకర్ణుడిలా నిద్ర పోతున్నాడు
బీఆర్ఎస్ గద్దర్ను తీవ్రంగా అవమానించిందని ఫైర్ అయ్యారు. గద్దర్ ను అవమానపర్చిన ఆ ప్రగతి భవన్ నుంచి ప్రజలు వాళ్లను తరిమికొట్టారన్నారు. కేంద్రమంత్రి బండి సంజయ్ గద్దర్కు పద్మశ్రీ పురస్కారం ఇవ్వమని మాట్లాడారు.. అలా మాట్లాడితే గద్ధరన్న కిరీటం కింద పడదు.. మీ కిరీటమే కింద పడింది... మీకు ప్రజలే బుద్ధి చెప్తారన్నారు. చరిత్ర పురుషుడు గద్దర్ అన్న అని ప్రశంసలు కురిపించారు.
