- కవిత ఏమన్నా స్వాతంత్ర్య సమరయోధురాలా?
- బీఆర్ఎస్ శ్రేణులపై మంత్రి కోమటిరెడ్డి ఫైర్
నల్గొండ, వెలుగు: ‘కవిత ఏమైనా స్వాతంత్ర సమరయోధురాలా? లిక్కర్ కేసులో అవినీతి చేసి జైలుకెళ్లి వచ్చింది. ఆమె కోసం సంబురాలు చేసుకోవడం విడ్డూరంగా ఉంది’ అని మంత్రి కోమటిరెడ్డి వెంకట్రెడ్డి అన్నారు. కేవలం బెయిల్ వచ్చినంత మాత్రాన బాంబులు పేల్చడం, స్వీట్లు పంచడం ఎందుకుని ప్రశ్నించారు. గురువారం నల్గొండలో ఆయన మీడియాతో మాట్లాడారు.
శ్రీశైలం సొరంగ మార్గానికి నిధులు కావాలని ఎన్నిసార్లు అడిగినా మాజీ సీఎంలు కిరణ్కుమార్రెడ్డి, కేసీఆర్ స్పందించలేదన్నారు. సీఎం రేవంత్ రెడ్డి సొరంగ మార్గానికి రూ.2,200 కోట్లు కేటాయించారని, వచ్చే రెండేళ్లలో సొరంగ మార్గం పూర్తిచేస్తామని చెప్పారు. నల్గొండలో కొత్తగా నిర్మిస్తున్న మెడికల్కాలేజీ భవనాన్ని సెప్టెంబర్ 12న సీఎం రేవంత్ రెడ్డి ప్రారంభిస్తామని మంత్రి వెల్లడించారు.
జిల్లాకు యూరియా అవసరం ఉందని జిల్లా వ్యవసాయ శాఖ అధికారి శ్రవణ్ మంత్రి దృష్టికి తీసుకురాగా, 4 వేల మెట్రిక్ టన్నుల యూరియాను పంపించాలని రాష్ట్ర వ్యవసాయ శాఖ మంత్రి తుమ్మల నాగేశ్వరరావుకు ఫోన్ ద్వారా విజ్ఞప్తి చేశారు. ఆర్అండ్బీ ఉన్నతాధికారులతో మాట్లాడిన మంత్రి.. నల్గొండ నియోజకవర్గంలో రోడ్ల కోసం రూ.250 కోట్లు శాంక్షన్ చేశామని, పెండింగ్లో ఉన్న రూ.165 కోట్లు తక్షణమే మంజూరు చేయాలని ఆదేశించారు.
