- జపాన్లో ఎక్కడా చెత్త కనిపించకపోవడం చూసి ఆశ్చర్యపోయా
- నగరాన్ని క్లీన్గా ఉంచేందుకు సిటిజన్ల సహకారం కావాలి: మంత్రి కేటీఆర్
హైదరాబాద్, వెలుగు: గ్రేటర్ హైదరాబాద్ను జపాన్ రాజధాని టోక్యో నగరంలా అద్భుతంగా మారుస్తామని మంత్రి కేటీఆర్ అన్నారు. కోటి మంది జనాభా ఉన్న హైదరాబాద్సిటీలో 20 వేల మంది సఫాయి కార్మికులు మాత్రమే ఉంటే ఎలా క్లీన్గా ఉంటుందని ప్రశ్నించారు. స్వచ్ఛ హైదరాబాద్కు జనాల సహకారం అవసరమన్నారు. ఈ నెల 16 నుంచి గ్రేటర్లో డివిజన్ స్థాయి పాలన మొదలుకానున్న సందర్భంగా జీహెచ్ఎంసీ డివిజన్ అధికారులతో హైటెక్స్లో ఆయన సమావేశం నిర్వహించారు. డివిజన్ స్థాయి పాలనపై వారికి దిశా నిర్దేశం చేశారు. ఈ సందర్భంగా మంత్రి మాట్లాడుతూ..‘ఇటీవల టోక్యో నగరానికి వెళ్లినప్పుడు ఎక్కడ చూసినా క్లీన్గా కనిపించింది. రోడ్లు, ఫుట్పాత్లు నీట్గా ఉన్నాయి. శుభ్రం చేసే సిబ్బంది ఎవరూ కనిపించలేదు.
రెండుమూడ్రోజుల పాటు చూసినా సిబ్బంది లేకపోవడంతో ఆశ్చర్యపోయా. సఫాయి కార్మికులు లేకుండా టోక్యోను ఎలా క్లీన్గా ఉంచుతున్నారంటూ ఓ అధికారిని అడిగా. అసలు చెత్త వేస్తే కదా క్లీన్ చేయడానికి అని ఆయన బదులిచ్చారు. జపాన్లో జనం రోడ్లపై చెత్త వేయరు. డస్ట్ బిన్లోనే వేస్తారు’ అని కేటీఆర్ తెలిపారు. హైదరాబాద్ను సైతం టోక్యో నగరంలా క్లీన్గా ఉంచాలని ఆయన కోరారు. ‘డివిజన్ ఆఫీసులు పెట్టాం కదా అని తెల్లారేసరికి హైదరాబాద్ క్లీన్గా మారాలంటే అయ్యే పని కాదని నాకు కూడా తెలుసు. కాకపోతే ఆ దిశగా జనాలకు అవగాహన కల్పించాలి. డివిజన్ అధికారులు సిటిజన్లతో మమేకమై వారి భాగస్వామ్యంతో ముందుకెళ్లాలి. భవిష్యత్లో హైదరాబాద్ నగరం టోక్యోతో పోటీపడి ముందుకెళ్లాలి. నేను ఈ మాట అనంగానే పేపరోళ్లు కేటీఆర్ హైదరాబాద్ను టోక్యో చేస్తానన్నడు అని రాస్తారు. రేపే అలా చేస్తానని చెప్పడం లేదు.
అందుకు కొంత టైమ్ పడుతుంది. జనాల భాగస్వామ్యంతో అది సాకారమవుతుంది’ అని తెలిపారు. గ్రేటర్లో ఒక డివిజన్ అంటే మున్సిపాలిటీతో సమానమైన జనాభా ఉంటుందని, కానీ ఒక మున్సిపాలిటీలో ఉన్నంత సిబ్బంది, సదుపాయాలు డివిజన్లో లేవన్నారు. ప్రజా సమస్యలను తొందరగా పరిష్కరించేందుకు కనీసం 10 మందితో వివిధ విభాగాలతో డివిజన్ ఆఫీసులు ఏర్పాటు చేస్తున్నామన్నారు.
సమావేశంలో మంత్రి తలసాని శ్రీనివాస్యాదవ్, ఎంపీ రంజిత్ రెడ్డి, సిటీ ఎమ్మెల్యేలు, ఎమ్మెల్సీలు, మేయర్ గద్వాల్ విజయలక్ష్మి, మున్సిపల్ శాఖ ప్రిన్సిపల్ సెక్రటరీ అర్వింద్ కుమార్, బల్దియా కమిషనర్ లోకేశ్కుమార్, వాటర్ బోర్డు ఎండీ దానకిశోర్, అధికారులు పాల్గొన్నారు.
