హైదరాబాద్, వెలుగు : ఫిబ్రవరి మొదటి వారం నుంచి అసెంబ్లీ నియోజకవర్గాల వారీగా బీఆర్ఎస్ పార్టీ నాయకులు, కార్యకర్తలతో సమీక్ష సమావేశాలు నిర్వహిస్తామని మాజీ మంత్రి నిరంజన్రెడ్డి తెలిపారు. 17 లోక్సభ నియోజకవర్గాల సమీక్ష సమావేశాలను 125 గంటలపాటు నిర్వహించామని ఆయన తెలిపారు. ఈ సమావేశాల్లో కార్యకర్తల నుంచి విలువైన సలహాలు, సూచనలు వచ్చాయన్నారు. సోమవారం తెలంగాణ భవన్లో ఆయన మీడియాతో మాట్లాడారు. కాంగ్రెస్, బీజేపీ కలిసి బీఆర్ఎస్ను దెబ్బతీయాలని చూస్తున్నాయని ఆయన విమర్శించారు.
ఎమ్మెల్యే కోటా ఎమ్మెల్సీ ఎన్నికలకు వేర్వేరు నోటిఫికేషన్లు ఇవ్వడంతోనే వారి మైత్రి తేటతెల్లమైందన్నారు. విధ్వంసమైన తెలంగాణ పేదల కోసం గులాబీ జెండా పుట్టిందని, నెత్తురుపారిన నేలపై నీళ్లు పారించిన చరిత్ర కేసీఆర్ది అన్నారు. ప్రజలు కేసీఆర్ను స్వాగతించే పరిస్థితి వచ్చే వరకు తాము సంయమనంతోనే ఉంటామన్నారు. బీఆర్ఎస్ను చీలుస్తామన్న వాళ్లు.. చీకట్లో, మట్టిలో కలుపుతామన్న వాళ్లంతా మట్టిలో కలిసిపోయారని మాజీ స్పీకర్మధుసూదనాచారి అన్నారు.
.40 ఏండ్ల రాజకీయ జీవితంలో ఎంతో మంది సీఎంలను చూశానని, రేవంత్లా చిల్లరగా ఎవరూ మాట్లాడలేదన్నారు. కేసీఆర్ ఒక్కడిగా బీఆర్ఎస్ను స్థాపించి ప్రత్యేక రాష్ట్రం సాధించారని అన్నారు. పార్టీ నేతల అలసత్వంతోనే ఓడిపోయామని చాలా మంది కార్యకర్తలు చెప్పారన్నారు. సమావేశంలో ఎంపీ బడుగుల లింగయ్య యాదవ్, మాజీ ఎంపీ రావుల చంద్రశేఖర్రెడ్డి తదితరులు పాల్గొన్నారు.
