ఏపీ బడ్జెట్: రాష్ట్ర ఆర్థిక వ్యవస్థ పతనం అంచున ఉంది.. మంత్రి పయ్యావుల కేశవ్

ఏపీ అసెంబ్లీ సమావేశాలు ప్రారంభమయ్యాయి. సమావేశాల మొదటిరోజు బడ్జెట్ ప్రవేశపెట్టారు ఆర్థిక మంత్రి పయ్యావుల కేశవ్. రూ.2.94 లక్షల కోట్లతో ఏపీ తొలి వార్షిక బడ్జెట్ ప్రవేశపెట్టారు పయ్యావుల. ఈ క్రమంలో బడ్జెట్ ప్రసంగంలో కీలక వ్యాఖ్యలు చేశారు పయ్యావుల. రాష్ట్ర ఆర్థిక వ్యవస్థ పతనం అంచున ఉందని.. రాష్ట్రాన్ని అభివృద్ధి పథంలో నడిపించాల్సిన అవసరం ఉందని అన్నారు. గత ప్రభుత్వ పాలనను ప్రజలు పాతరేశారని.. కూటమి ప్రభుత్వం 93 శాతం ప్రజల ఆమోదాన్ని పొందగలిగిందని అన్నారు.

సమాచార విప్లవాన్ని వినియోగించుకోవాలని, శాశ్వత రాజధాని లేకుండా రాష్ట్ర విభజన జరిగిందని అన్నారు. రాష్ట్రాన్ని పునర్మిర్మాణ దిశగా నడిపించే బాధ్యత మా ప్రభుత్వం తీసుకుందని అన్నారు పయ్యావుల కేశవ్. గత ప్రభుత్వం నీటి పారుదల రంగాన్ని పూర్తిగా విస్మరించిందని, పోలవరం నిర్మాణాన్ని ముందుకు తీసుకెళ్లలేదని ఆగ్రహం వ్యక్తం చేశారు. ఉత్పాదక మూలధనాన్ని గత ప్రభుత్వం నిలిపివేసిందని.. తద్వారా ఉత్పత్తి తగ్గిపోయి అభివృద్ధికి ఆటంకం కలిగిందని అన్నారు పయ్యావుల.

కొంతమంది లాభం కోసమే గత ప్రభుత్వ పాలన సాగిందని.. వ్యక్తిగత అవసరాల కోసమే పాలసీలు చేశారని అన్నారు. గత ప్రభుత్వ విధానాల వల్ల రాష్ట్ర ఆర్థిక వ్యవస్థకు తీవ్ర నష్టం కలిగిందని అన్నారు. 2019 నుండి 2024 వరకు రాష్ట్రంలో చీకటి పాలన సాగిందని అన్నారు.