- రాష్ట్రంలోనే భద్రాద్రికొత్తగూడెం జిల్లా మోడల్ గా ఉండాలి
భద్రాద్రికొత్తగూడెం, వెలుగు : భూ సమస్యలన్నీ పరిష్కరిస్తామని, ఇందులో భద్రాద్రికొత్తగూడెం జిల్లా రాష్ట్రంలోనే మోడల్ ఉండాలని రెవెన్యూ శాఖ మంత్రి పొంగులేటి శ్రీనివాసరెడ్డి అన్నారు. కలెక్టరేట్లో కలెక్టర్ జితేశ్వి పాటిల్, ఐటీడీఏ పీవో రాహూల్తో కలిసి పలు శాఖల ఆఫీసర్లతో భూ సమస్యలపై శనివారం రివ్యూ చేశారు. కొత్తగూడెం నియోజకవర్గానికి సంబంధించిన భూ మ్యాప్లను పరిశీలించారు. అనంతరం ఆయన మీడియాతో మాట్లాడారు.
రాష్ట్ర వ్యాప్తంగా పలు చోట్ల ఒకే సర్వే నెంబర్లో ఫారెస్ట్, పట్టా, గవర్నమెంట్ భూములున్నాయన్నారు. దీంతో చాలా ఇబ్బంది పడుతున్నారని చెప్పారు. భూ భారతి చట్టంతో ఆ భూస్వాముల రైతలకు న్యాయం చేస్తామన్నారు. జిల్లాలోని ఐదు నియోజకవర్గాల్లో ఒక పెద్ద సర్వే నెంబర్ను మోడల్గా తీసుకొని సర్వే చేయనున్నట్టు తెలిపారు. సర్వే రిపోర్టు వచ్చిన తర్వాత రాష్ట్ర వ్యాప్తంగా ఇటువంటి సమస్యలున్న ప్రాంతాల్లోని భూ సమస్యలన్నీ పరిష్కరిస్తామని చెప్పారు.
భూ సర్వేకు అవసరమైన ఏర్పాట్లు చేయాలని కలెక్టర్ను ఆదేశించారు. ఈ ప్రోగ్రాంలో ఖమ్మం ఎంపీ రామసహాయం రఘురాంరెడ్డి, ఇల్లెందు, అశ్వారావుపేట, పినపాక ఎమ్మెల్యేలు కోరం కనకయ్య, జారే ఆదినారాయణ, పాయం వెంకటేశ్వర్లు, అడిషనల్ కలెక్టర్ డి. వేణుగోపా, మార్క్ ఫెడ్ డైరెక్టర్ కొత్వాల శ్రీనివాసరావు, ఉమ్మడి ఖమ్మం జిల్లా సర్వే ల్యాండ్ అండ్ రికార్డ్స్ ఏడీ శ్రీనివాసులు, ఆర్డీవో మధు పాల్గొన్నారు.
సింగరేణి ఆఫీసర్లపై ఆగ్రహం పాల్వంచలో పర్యటన, కలెక్టరేట్లో ఆఫీసర్లతో రివ్యూ అనంతరం మంత్రి రెస్ట్ తీసుకునేందుకు ఇల్లెందు క్రాస్ రోడ్డులోని సింగరేణి గెస్ట్ హౌస్కు వెళ్లగా అక్కడ గదులు శుభ్రంగా లేకపోవడంపై ఆగ్రహం వ్యక్తం చేశారు. ఖమ్మం జిల్లా కల్లూరు మండలం నారాయణపురంలోని తన నివాసానికి ఆదివారం సింగరేణి గెస్ట్ హౌస్ ఆఫీస్ నిర్వహణ ఆఫీసర్లు, సిబ్బంది రికార్డులతో రావాలని ఆదేశించారు.
