భద్రాద్రికొత్తగూడెం, వెలుగు : ఆఫీసర్ల పనితీరు బాగుంటేనే జిల్లా అభివృద్ధి చెందుతుందని రెవెన్యూ శాఖ మంత్రి పొంగులేటి శ్రీనివాస రెడ్డి అన్నారు. చుంచుపల్లి మండలంలోని మంత్రి క్యాంప్ ఆఫీస్లో బుధవారం జిల్లా ఆఫీసర్లతో డెవలప్మెంట్ వర్క్స్పై రివ్యూ నిర్వహించారు. జిల్లాలో ఏమేం పనులు జరుగుతున్నాయో ఆఫీసర్లను అడిగి తెలుసుకున్నారు. అభివృద్ధి పనుల విషయంలో ఆఫీసర్లు ఒకరినొకరు కో ఆర్డినేషన్ చేసుకుంటూ వర్క్స్ త్వరగా పూర్తి చేయాలని సూచించారు. సీఎస్ఆర్ ఫండ్స్ నిర్వీర్యం అవుతున్నట్టు తన దృష్టికి వచ్చిందన్నారు.
సీఎస్ఆర్ ఫండ్స్ను పూర్తి స్థాయిలో వినియోగించేలా అవసరమైన చర్యలు చేపట్టాలని సీపీవోకు సూచించారు. పంచాయతీ సెక్రటరీలతోపై డీపీవో, తహసీల్దార్లపై ఆర్డీవోలు ఎప్పటికప్పుడు పర్యవేక్షించాలన్నారు. గ్రామాల్లో పనిచేసే పంచాయతీ సెక్రటరీలు నివాసం ఓ చోట, విధులు మరో నిర్వహిస్తుండడంతో గ్రామాలపై వారికి పట్టు ఉండడం లేదని చెప్పారు. అభివృద్ధి పనులను ఆకస్మికంగా తనిఖీ చేస్తానన్నారు. నిర్లక్ష్యంగా ఉంటే చర్యలు తప్పవని హెచ్చరించారు. అడిషనల్ కలెక్టర్లు అన్ని శాఖల ఆఫీసర్లను సమన్వయం చేసుకుంటూ అభివృద్ధి పనులను ముందుకు సాగేలా చూడాలని సూచించారు.
రెడ్డి వనమహోత్సవంలో..
లక్ష్మీదేవిపల్లి మండలంలోని ఇల్లెందు క్రాస్ రోడ్డు ప్రాంతంలోని సెంట్రల్ పార్క్లో బుధవారం ఏర్పాటు చేసిన రెడ్డి వనమహోత్సవంలో మంత్రి మాట్లాడారు. రెడ్డి బంధువులంతా ఐక్యంగా ఉండాలన్నారు. ఈ ప్రోగ్రాంలో పినపాక ఎమ్మెల్యే పాయం వెంకటేశ్వర్లు, రెడ్డి సంక్షేమ సంఘం నేతలు లేళ్ల వెంకటరెడ్డి, జమలా రెడ్డి, మన్నెం జవహర్ రెడ్డి, కె. శ్రీనివాస్ రెడ్డి, వై. శ్రీనివాస్ రెడ్డి, పి. శ్రీనివాస్ రెడ్డి పాల్గొన్నారు.
అభివృద్ధి పనులకు శంకుస్థాపన
కూసుమంచి : మండల పరిధిలోని ముత్యాల గూడెం, చేగొమ్మ, జీళ్లచెరువు గ్రామాల్లో చేపట్టిన సీసీరోడ్డు, డ్రెయినేజీ నిర్మాణ పనులకు మంత్రి పొంగులేటి శంకుస్థాపన చేశారు. ఈ సందర్భంగా ఆయన మాట్లాడుతూ అభివృద్ధి పనులను నాణ్యతతో త్వరగా పూర్తి చేయాలన్నారు. ఈ కార్యక్రమంలో ఖమ్మం ఆర్డీవో నర్సింహారావు, కాంగ్రెస్ నాయకులు సుధాకర్రెడ్డి, మంకెన వాసు, సూర్యానారాయణరెడ్డి, బజ్జూరి వెంకటరెడ్డి తదితరులు పాల్గొన్నారు.
