- గత సర్కార్ వైఫల్యాల వల్లే ప్రాజెక్టు గోడ కూలింది
హనుమకొండ, వెలుగు: సుంకిశాల రిటైనింగ్ వాల్ కూలిపోయిన ఘటనపై సమగ్ర విచారణ జరిపిస్తామని, బాధ్యులపై కఠిన చర్యలు తీసుకుంటామని మంత్రి పొన్నం ప్రభాకర్ స్పష్టం చేశారు. ఇప్పటికే ప్రభుత్వం విచారణకు ఆదేశించిందని, ఎట్టిపరిస్థితుల్లోనూ దోషులను వదిలిపెట్టే ప్రసక్తే లేదని అన్నారు. ఈ ఘటనకు గత బీఆర్ఎస్ ప్రభుత్వ నిర్వాకమే కారణమని మండిపడ్డారు. ‘‘గత బీఆర్ఎస్ ప్రభుత్వ వైఫల్యాలను కప్పి పుచ్చుకునేందుకు ఆ పార్టీ లీడర్లు కాంగ్రెస్పై ఆరోపణలు చేస్తున్నరు. విషయాన్ని తప్పుదోవ పట్టించేందుకు ప్రయత్నిస్తున్నరు” అని ఆయన అన్నారు.
హనుమకొండ జిల్లా భీమదేవరపల్లి, ఎల్కతుర్తి మండలాల్లోని రైతు వేదికల్లో వ్యవసాయ అనుబంధ రంగాల పథకాలపై గురువారం నిర్వహించిన అవగాహన సదస్సుల్లో మంత్రి పొన్నం పాల్గొన్నారు. ఈ సందర్భంగా మాట్లాడుతూ.. గత బీఆర్ఎస్ హయాంలోనే రిటైనింగ్ వాల్ డిజైన్, ప్లాన్, నిర్మాణం జరిగిందని చెప్పారు. అప్పటి లోపభూయిష్ట విధానాలతోనే గోడ కూలి, దాదాపు రూ.15 కోట్ల మేర నష్టం వాటిల్లిందని అన్నారు.
అనవసర నిందలు వేస్తే ఊరుకోం
ఎంపీ ఎన్నికల్లో బీఆర్ఎస్ ఓటమి తర్వాత ఆ పార్టీ నేతల్లో అసహనం పెరిగిపోయిందని, ప్రజా సమస్యలపై మాట్లాడకుండా ఇష్టారీతి న ఆరోపణలు చేస్తున్నారని మంత్రి పొన్నం అన్నారు. సీఎంగా ఉన్నప్పుడు కేసీఆర్ పదేండ్లు ఫామ్హౌస్ నుంచి బయటకు రాలేదని, విదేశాలకు వెళ్లి పెట్టుబడులు తీసుకొచ్చే ప్రయత్నం చేయలేదని విమర్శించారు. బాధ్యత గల ప్రతిపక్షంగా నిర్మాణాత్మక సలహాలు ఇస్తే స్వీక రించడానికి సిద్ధంగా ఉన్నామని, అనవసర నిందలు వేస్తే చూస్తూ ఊరుకోబోమని బీఆర్ఎస్ నేతలకు ఆయన హెచ్చరించారు.
