హైదరాబాద్: జీహెచ్ఎంసీ మేయర్పై అవిశ్వాస తీర్మానం టెక్నికల్గా సాధ్యమయ్యే అంశం కాదని.. దాన్ని పట్టించుకోవద్దని కాంగ్రెస్ కార్పొరేటర్లకు మంత్రులు పొన్నం, శ్రీధర్ బాబు సూచించారు. కౌన్సిల్ సమావేశం, మేయర్పై బీఆర్ఎస్ అవిశ్వాస తీర్మానం పెట్టాలని యోచిస్తోన్నట్లు ప్రచారం జరుగుతోన్న నేపథ్యంలో కాంగ్రెస్ కార్పొరేటర్లు, మేయర్ విజయలక్ష్మితో బుధవారం (జనవరి 29) హైదరాబాద్ ఇంచార్జ్ మంత్రి పొన్నం ప్రభాకర్, మంత్రి శ్రీధర్ బాబు మినిస్టర్ క్వార్టర్స్లో భేటీ అయ్యారు.
2025, జనవరి 30న జరగనున్న కౌన్సిల్ మీటింగ్లో అనుసరించాల్సిన వ్యూహాలు, బీఆర్ఎస్ కార్పొరేటర్లు అవిశ్వాస తీర్మానం అంశాన్ని తీసుకొస్తే ఎలా ఎదుర్కొవాలన్న అంశంపై చర్చించారు. కౌన్సిల్లో అనుసరించాల్సిన వ్యూహాలపై కార్పొరేటర్లకు మంత్రులు దిశానిర్దేశం చేశారు. కాంగ్రెస్ ప్రభుత్వం వచ్చాక గ్రేటర్లో జరిగిన అభివృద్ధి, కేటాయించిన నిధుల అంశాలపై కౌన్సిల్లో చర్చించాలని కార్పొరేటర్లకు సూచించారు.
కౌన్సిల్లో కాంగ్రెస్ కార్పొరేటర్లు అంతా ఏకతాటిపై ఉండి ప్రతి పక్షాలకు కౌంటర్లు ఇవ్వాలని చెప్పారు. రేపు (గురువారం) కౌన్సిల్ భేటీ ప్రారంభానికి ముందు ఉదయం 8 గంటలకు మినిస్టర్ క్వార్టర్స్లోని మంత్రి పొన్నం ఇంట్లో గ్రేటర్ పరిధిలోని కాంగ్రెస్ కార్పొరేటర్లతో మరోసారి భేటీ కానున్నారు. ఈ కార్యక్రమంలో మేయర్ గద్వాల విజయలక్ష్మి, ఖైరతాబాద్ ఎమ్మెల్యే దానం నాగేందర్, గ్రేటర్ పరిధిలోని కాంగ్రెస్ పార్టీ ఎమ్మెల్సీలు, తదితర ముఖ్య నాయకులు పాల్గొన్నారు.
