తెలంగాణలో జరుగుతున్న లైంగిక దాడుల ఘటనలపై మంత్రి సీతక్క సీరియస్ అయ్యారు. నాగర్ కర్నూలు జిల్లా ఉర్కొండ, హైదరాబాద్ లో జర్మనీ యువతిపై లైంగిక దాడి ఘటనలపై సీతక్క ఆరాదీశారు. పోలీస్ ఉన్నతాధికారులతో మాట్లాడి వివరాలు తీసుకున్నారు సీతక్క.
ఈ సందర్భంగా మాట్లాడిన సీతక్క లైంగిక దాడి ఘటనలను ఉపేక్షించేది లేదన్నారు. బాధితులకు అన్ని రకాలుగా అండగా ఉంటామని చెప్పారు. నిందితులకు కఠిన శిక్ష పడేలా చర్యలు తీసుకుంటామన్నారు. నిందితులను గంటల వ్యవధిలోనే అరెస్ట్ చేశామని చెప్పారు. లైంగిక దాడి ఘటనకు మత్తుపధార్థాలు కారణమని భావిస్తున్నామన్నారు. మత్తు పదార్థాల కట్టడి కోసం పనిచేస్తున్నామని తెలిపారు సీతక్క.
నాగర్ కర్నూల్ జిల్లా ఊర్కొండపేటలోని అంజన్న ఆలయం దగ్గర మొక్కులు తీర్చుకోవడానికి వచ్చిన ఓ యువతి కాలకృత్యాల కోసం ఆలయ సమీపంలోని గుట్ట ప్రాంతం వైపుకు వెళ్లగా.. యువతిని బలవంతంగా ఎత్తుకెళ్లి గ్యాంగ్ రేప్ చేశారు. బాధితులు పోలీసులకు ఫిర్యాదు చేయడంతో కేసు నమోదు చేశారు.
హైదరాబాద్ పహాడీషరీఫ్ ప్రాంతంలో లిఫ్ట్ ఇస్తామని జర్మనీ యువతిని తీసుకెళ్లి నిర్మానుష్య ఏరియాలో గ్యాంగ్ రేప్ చేశారు కొందరు దుండగులు. వారి నుంచి తప్పించుకున్న జర్మనీ యువతి పోలీసులకు ఫిర్యాదు చేసింది.
