హైదరాబాద్/గచ్చిబౌలి, వెలుగు : ప్రభుత్వ శాఖలకు కంప్యూటర్ హార్డ్వేర్, సాఫ్ట్వేర్ను సరఫరా చేసే నోడల్ ఏజెన్సీ తెలంగాణ టెక్నాలజీ సర్వీసెస్ (టీజీటీఎస్) వ్యాపార పరిధిని పెంచాలని అధికారులకు ఐటీ, పరిశ్రమల శాఖ మంత్రి శ్రీధర్ బాబు సూచించారు. నిరుడు సంస్థకు రూ.5 కోట్ల లాభం వచ్చిందని, ఇప్పుడు కార్యకలాపాలను పెంచుకోవడం ద్వారా టర్నోవర్ను మరింత పెంచుకోవాలన్నారు. టీజీటీఎస్ పనితీరుపై సంస్థ కార్యాలయంలో శుక్రవారం ఆయన సమీక్ష చేశారు. ప్రభుత్వ విభాగాలన్నీ టీజీటీఎస్ ద్వారానే కంప్యూటర్ పరికరాలు, సాఫ్ట్వేర్లను సమకూర్చుకునేలా ఐటీ సెక్రటరీ జయేశ్ రంజన్తో చర్చించాలన్నారు.
ప్రస్తుతం 44 ప్రభుత్వ విభాగాలు, 140 ఇతర డిపార్ట్మెంట్లకు టీజీటీఎస్ సేవలు అందిస్తున్నదని సంస్థ ఎండీ శంకరయ్య మంత్రికి తెలిపారు. కొన్ని ఒప్పందాల్లోనే సొంతంగా కొనుగోళ్లు జరుపుతామని చెప్పారు. దీనిపై స్పందించిన మంత్రి.. కొద్ది మొత్తంలో కొనుగోళ్ల కంటే భారీ ఆర్డర్ల ద్వారా రాయితీలు, తక్కువ ధరకే ఎలక్ట్రానిక్ పరికరాలు సేకరించవచ్చని పేర్కొన్నారు. ఈ సందర్భంగా టీజీటీఎస్ చైర్మన్ మన్నె సతీశ్ కుమార్తో కలిసి మంత్రి శ్రీధర్ బాబు ఉద్యోగులతో ఇంటరాక్ట్ అయ్యారు. వారి సమస్యలను అడిగి తెలుసుకున్నారు.
ఇన్నొవేషన్ ఎకోసిస్టంలో టీహబ్ ది కీలకపాత్ర
ఐటీ ఎగుమతులు, ఆర్థిక వృద్ధిని నడపడానికి మిడ్ మార్కెట్ గ్లోబల్ కేపబిలిటీ సెంటర్లు (జీసీసీ) కీలకమైనవని ఐటీ శాఖ మంత్రి శ్రీధర్బాబు తెలిపారు. శుక్రవారం టీహబ్లో జరిగిన జీసీసీ ఇన్నొవేషన్ సమ్మిట్ కు మంత్రి ముఖ్యఅతిథిగా హాజరై మాట్లాడారు. ఆర్టిఫిషియల్ ఇంటెలిజెన్స్, డేటా అనలిటిక్స్, క్లౌడ్ కంప్యూటింగ్లో హైదరాబాద్ యువతకు అసాధారణ ప్రతిభ ఉందన్నారు. సహాయక విధానాలు, బలమైన మౌలిక సదుపాయాలతో జీసీసీలను ఆకర్షించడానికి ప్రాధాన్యం ఇస్తున్నామన్నారు. ఇన్నొవేషన్ ఎకో సిస్టంలో టీహబ్ కీలకపాత్ర పోషిస్తుందని చెప్పారు. అందరూ కలిసి రాష్ర్టాన్ని గ్లోబల్ టెక్నాలజీ హబ్గా తీర్చిదిద్దేందుకు కృషి చేయాలని మంత్రి పిలుపునిచ్చారు.
