- ఐటీడీఏలను తెచ్చింది మా ప్రభుత్వమే
- మహిళలకు రూ.2 లక్షల బీమా అమలు చేస్తామని వెల్లడి
హైదరాబాద్, వెలుగు: ఇందిరా గాంధీ నుంచి సోనియా గాంధీ వరకు కాంగ్రెస్ పార్టీ మహిళా సాధికారితకు పాటుపడిన పార్టీ అని మంత్రి సీతక్క అన్నారు. ఎస్సీ, ఎస్టీలకు అండగా నిలిచింది కాంగ్రెస్సే అన్నారు. కాంగ్రెస్ ఇచ్చిన రిజర్వేషన్లతోనే తన లాంటి ఆదివాసీలు సభలో ఉన్నారని చెప్పారు. మంగళవారం అసెంబ్లీలో బడ్జెట్పై జరిగిన చర్చ సందర్భంగా ఎమ్మెల్యే కోవా లక్ష్మి వ్యాఖ్యలకు సీతక్క కౌంటర్ ఇచ్చారు. నాడు మంత్రిగా ఉన్న భీంరావు హయాంలో కాంగ్రెస్ ప్రభుత్వం ఐటీడీఏలను తీసుకొచ్చిందని గుర్తుచేశారు. దాని వల్ల మారుమూల తండాలకూ స్కూళ్లు వచ్చి లోకల్ పిల్లలు చదువుకునేందుకు అవకాశం ఏర్పడిందన్నారు.
కానీ, బీఆర్ఎస్ సర్కారు ఆ స్కూళ్లను నిర్లక్ష్యం చేసిందని ఫైర్ అయ్యారు. మహిళలు 17 రకాల వ్యాపారాలు చేసుకునేలా ప్రయత్నాలు చేస్తున్నామన్నారు. మహిళలకు రూ.2 లక్షల బీమా అమలు చేయబోతున్నామన్నారు. ‘‘ఆసిఫాబాద్, ఆదిలాబాద్ జిల్లాలు నిజంగానే వెనుకబడ్డాయి. వాటిని అభివృద్ధి చేస్తాం. దండారీ జరిగినప్పుడు నిరుడు బీఆర్ఎస్ ప్రభుత్వమే ఉంది. వాళ్లే నిధులు ఇవ్వలేదు. మేం తప్పకుండా నిధులిస్తాం. గత ప్రభుత్వం అంగన్ వాడీ టీచర్లు రిటైర్ అయితే రూ.లక్ష, ఆయాలకు రూ.50 వేలు ఇచ్చేది. మా ప్రభుత్వం దానిని రూ.2 లక్షలు, రూ.లక్షకు పెంచాలని నిర్ణయించింది’’ అని మంత్రి పేర్కొన్నారు.
గత సర్కారు సీడీపీ నిధులివ్వలే
తాను ఎమ్మెల్యేగా ఉన్న గత ఐదేండ్లలో ఏనాడూ కేసీఆర్ ప్రభుత్వం సీడీపీ నిధులు ఇవ్వలేదని సీతక్క ఆరోపించారు. కాంగ్రెస్ ప్రభుత్వంలో ఇస్తామన్నారు. తన తండ్రి గురించి బీఆర్ఎస్ నేతలు తప్పుడు ఆరోపణలు చేశారని మండిపడ్డారు. తాను ఎమ్మెల్యే కాకముందు నుంచే తన తండ్రి పోడు చేశారన్నారు. తాను అడవిలో ఉన్నప్పుడే పోడు కొట్టారన్నారు.
