- ఈటో సంస్థ ప్రతినిధులతో మంత్రి శ్రీధర్ బాబు
హైదరాబాద్, వెలుగు: ఎలక్ట్రిక్ వెహికల్స్, లిథియం బ్యాటరీల తయారీ పరిశ్రమలకు ప్రోత్సాహకాలు ఇస్తామని ఐటీ, పరిశ్రమల శాఖ మంత్రి శ్రీధర్ బాబు చెప్పారు. ఆయా పరిశ్రమలకు మెరుగైన మౌలిక వసతులు కల్పిస్తామని, ఆ విషయంలో ఎలాంటి అవాంతరాలు లేకుండా చూస్తామని హామీ ఇచ్చారు. ఈవీల తయారీలో రాష్ట్రాన్ని అగ్రస్థానంలో నిలిచేలా కృషి చేస్తామన్నారు. శనివారం గోల్డ్ స్టోన్ ప్రసాద్ ఆధ్వర్యంలో ఈటో (ఈటీఓ) ఎలక్ట్రిక్ ఆటో వాహన సంస్థ ప్రతినిధులు సచివాలయంలో మంత్రి శ్రీధర్బాబుతో సమావేశమయ్యారు.
ఏటా 10 వేల ఎలక్ట్రిక్ ఆటోలను తయారు చేసేలా జడ్చర్లలో ఏర్పాటు చేసిన పరిశ్రమను మరింతగా విస్తరించాలని సంస్థ ప్రతినిధులకు మంత్రి శ్రీధర్ బాబు సూచించారు. ఎలక్ట్రిక్ వాహనాలకు ప్రపంచవ్యాప్తంగా డిమాండ్ పెరుగుతున్నదని, కాబట్టి విదేశీ పెట్టుబడులను తీసుకువచ్చేందుకు కృషి చేస్తామని చెప్పారు. ప్రభుత్వం తరఫున అన్ని రకాలుగా సహకరిస్తామన్నారు.
మహిళా ఆటో డ్రైవర్లను ప్రోత్సహించేందుకు ఈటో సంస్థ చేపట్టిన కార్యక్రమాన్ని మంత్రి శ్రీధర్ బాబు ప్రశంసించారు. హైదరాబాద్, జిల్లా కేంద్రాల్లో మహిళలకు డ్రైవింగ్ లో శిక్షణ ఇవ్వడం ద్వారా వారు సొంతంగా ఉపాధి పొందేలా తీర్చిదిద్దాలని కోరారు. ప్రభుత్వానికి తగిన సూచనలు చేస్తే ప్రోత్సాహకాలపై విధాన నిర్ణయం ప్రకటిస్తామని ఆయన తెలిపారు.
