- రైతుల ప్రస్తుత సమస్యలకు ఆయనే కారణం
పెద్దపల్లి, వెలుగు : రాష్ట్రవ్యాప్తంగా ప్రస్తుతం రైతులు ఎదుర్కొంటున్న సమస్యలకు కేసీఆరే కారణమని, అలాంటి వ్యక్తే ఇప్పుడు లోక్సభ ఎన్నికల కోసం రైతులపై మొసలి కన్నీరు కారుస్తున్నారని ఐటీ, పరిశ్రమలు, శాసనసభ వ్యవహారాల మంత్రి శ్రీధర్బాబు మండిపడ్డారు. ‘‘నిరుడు ఆగస్టు నుంచే వర్షాలు పడలేదు.. దీంతో రిజర్వాయర్లు నిండలేదు.. అప్పుడు ఉన్నది బీఆర్ఎస్ సర్కారే.
మేడిగడ్డ కుంగిపోయింది వాళ్ల హయాంలోనే.. బ్యారేజీని కాపాడుకునేందుకు నీళ్లను కిందికి వదిలేసింది కూడా వాళ్ల హయాంలోనే. కాంగ్రెస్ ప్రభుత్వం ఏర్పాటై మూడు నెలలే అయింది.. అప్పటికే వర్షాకాలం అయిపోయింది. కానీ, కాంగ్రెస్ప్రభుత్వమే కరువుకు కారణమని కేసీఆర్ చెప్పడం విడ్డూరం’’ అని అన్నారు. పెద్దపల్లి జిల్లా కేంద్రంలో సోమవారం మీడియా సమావేశంలో మంత్రి శ్రీధర్బాబు మాట్లాడారు.
పంటల పరిశీలన పేరుతో కాలువలు లేని దగ్గర, బోర్ల మీద ఆధారపడి పంటలు పండించే దగ్గర కేసీఆర్ పర్యటించి, రాష్ట్రమంతా పంటలు ఎండినట్లుగా ప్రజలను మోసం చేస్తున్నారని ఫైర్ అయ్యారు. తమ ప్రభుత్వం సాగునీటి సమస్య శాశ్వత పరిష్కారం కోసం ప్రణాళికలు సిద్ధం చేస్తున్నదని ఆయన వెల్లడించారు.
పదేండ్లలో పరిహారం ఎందుకియ్యలే
బీఆర్ఎస్ పదేండ్ల పాలనలో ఏనాడూ రైతులను పట్టించుకోలేదని మంత్రి శ్రీధర్బాబు అన్నారు. ప్రకృతి వైపరీత్యాలు వచ్చి పంట నష్టపోతే ఎలాంటి పరిహారం ఇవ్వలేదని, ఇలాంటి సమయాల్లో రైతులను ఆదుకునే ప్రణాళికలు ఏమీ రూపొందించలేదని మండిపడ్డారు. లక్ష రూపాయల రుణ మాఫీని సగం మంది రైతులకు కూడా గత బీఆర్ఎస్ సర్కార్ అమలుచేయలేదని అన్నారు.
కాళేశ్వరం రీడిజైనింగ్సరికాదని కాంగ్రెస్ పార్టీ మొదటి నుంచీ చెప్తున్నా అప్పటి బీఆర్ఎస్ సర్కారు పట్టించుకోలేదు. కాళేశ్వరం పేరుతో రైతుల భూములు, ఇండ్లు తీసుకున్నారు తప్ప ఆ ప్రాజెక్టు ద్వారా పెద్దపల్లి జిల్లా రైతులకు చుక్క నీరు కూడా రాలేదు” అని పేర్కొన్నారు. యుద్ధ ప్రాతిపదికన పత్తిపాక రిజర్వాయర్ నిర్మిస్తామని చెప్పారు. రామగుండం నియోజకవర్గంలోని పాలకుర్తి లిఫ్ట్ను పూర్తి చేస్తామన్నారు. ఈ రెండు ప్రాజెక్టులు పూర్తిచేశాకే వచ్చే అసెంబ్లీ ఎన్నికల్లో ఓట్లు అడుగుతామన్నారు. డీ 83, 86 కాలువల ద్వారా చివరి ఆయకట్టు వరకు సాగునీరు అందిస్తామని తెలిపారు.
బీఆర్ఎస్ నుంచి టికెట్ పొందినవాళ్లు గత పాలనలో సాగిన ఫోన్ ట్యాపింగ్, లిక్కర్ స్కామ్ గురించి ప్రజలు అడుగుతున్న ప్రశ్నలకు సమాధానం చెప్పలేక, టికెట్వద్దనుకొని కాంగ్రెస్లో చేరుతున్నారని మంత్రి శ్రీధర్బాబు అన్నారు. ఫోన్ ట్యాపింగ్లో నిందితులుగా ఉన్నవాళ్లు దోషులుగా తేలితే కఠిన శిక్షలుంటాయని చెప్పారు. మీడియా సమావేశంలో పెద్దపల్లి, రామగుండం ఎమ్మెల్యేలు విజయరమణారావు, ఠాకూర్ మక్కాన్ సింగ్, నాయకులు గోపగాని సారయ్య, మస్రత్, ప్రకాశరావు, అన్నయ్యగౌడ్ తదితరులు పాల్గొన్నారు.
నిరుడు ఆగస్టు నుంచే వర్షాలు పడలేదు.. దీంతో రిజర్వాయర్లు నిండలేదు.. అప్పుడు ఉన్నది బీఆర్ఎస్ సర్కారే. మేడిగడ్డ కుంగిపోయింది వాళ్ల హయాంలోనే.. బ్యారేజీని కాపాడుకునేందుకు నీళ్లను కిందికి వదిలేసింది కూడా వాళ్ల హయాంలోనే. కాంగ్రెస్ ప్రభుత్వం ఏర్పాటై మూడు నెలలే అయింది. అలాంటిది కరువుకు కాంగ్రెస్ ప్రభుత్వమే కారణమని కేసీఆర్ చెప్పడం విడ్డూరం. ‑ మంత్రి శ్రీధర్బాబు
