- పీజీఏ, స్టోన్క్రాఫ్ట్ కలిసి ఏర్పాటు చేస్తున్నయ్:మంత్రి శ్రీధర్బాబు
- పదేండ్లలో 10 వేల మందికి ఉపాధి లభిస్తుందని వెల్లడి
'హైదరాబాద్, వెలుగు: ప్రొఫెషనల్ గోల్ఫర్స్ అసోసియేషన్ ఆఫ్ అమెరికా (పీజీఏ), స్టోన్ క్రాఫ్ట్తో కలిసి హైదరాబాద్ సిటీ దక్షిణాదిన నిర్మించతలపెట్టిన ఫోర్త్ సిటీలో గోల్ఫ్ సిటీని ఏర్పాటు చేయబోతున్నట్టు ఐటీ, ఇండస్ట్రీస్ శాఖ మంత్రి దుద్దిళ్ల శ్రీధర్బాబు తెలిపారు. రాబోయే పదేండ్లలో 10 వేల మందికి ఉపాధి లభిస్తుందని చెప్పారు. శనివారం సెక్రటేరియెట్లో అమెరికాలోని ఫ్రిస్కోకు చెందిన పీజీఏ ప్రతినిధులు మంత్రి శ్రీధర్బాబుతో సమావేశమయ్యారు.
గోల్ఫ్ కోర్టులు, రెసిడెన్షియల్ కాంప్లెక్స్లు, హోటళ్లు, ఎంటర్టైన్మెంట్ హబ్లను ఏర్పాటు చేసేందుకు పీజీఏ, స్టోన్క్రాఫ్ట్ సంస్థలు సంసిద్ధత వ్యక్తం చేశాయని శ్రీధర్బాబు చెప్పారు. ప్రస్తుతం పీజీఏ సంస్థ..షాపూర్జీ పల్లోంజీ సంస్థతో కలిసి ముంబైలో గోల్ఫ్ సిటీని నిర్మిస్తున్నదని తెలిపారు. ఇక్కడ స్టోన్క్రాఫ్ట్ భాగస్వామ్యంతో భారీ పెట్టుబడులు పెట్టేందుకు అంగీకరించిందని వివరించారు. ఫోర్త్ సిటీలో ఎలాంటి కాలుష్యం వెలువడని నెట్-జీరో సిటీని నిర్మిస్తున్నట్టు పేర్కొన్నారు. నిర్మాణాలకు మూడింతలు ప్రకృతి వనాలను పెంచడం ద్వారా ఆహ్లాదకర నివాస ప్రదేశాన్ని ఏర్పాటు చేస్తామని సంస్థలు వెల్లడించాయన్నారు.
పీజీఏ కన్సార్టియం దాదాపు 200 ఎకరాల్లో ‘18 హోల్’ స్టాండర్డ్ గోల్ఫ్ కోర్సును ఏర్పాటు చేస్తుందని తెలిపారు. పీజీఏ ప్రపంచంలోని అతిపెద్ద క్రీడా సంస్థల్లో ఒకటని, 30,000 మందికి పైగా గోల్ఫ్ నిపుణులు ఆ సంస్థలో పనిచేస్తున్నారని చెప్పారు. పలు చాంపియన్‌‌షిప్‌‌లు, రైడర్ కప్ వంటి టోర్నీలను నిర్వహిస్తున్నదని తెలిపారు. ఈ భేటీలో స్టోన్ క్రాఫ్ట్ సీఈవో కీర్తి చిలుకూరి, అలోక్ తివారీ, పీజీఏ ప్రతినిధులు టిమ్ లాబ్, అలెక్స్ హే, డేవిడ్ బ్లమ్, కెన్ సాగర్, రాధా కిశోర్, తదితరులు పాల్గొన్నారు.
నిర్మాణ రంగంలో హైదరాబాద్ టాప్
నిర్మాణ రంగంలో దేశంలోనే హైదరాబాద్అగ్రగామిగా నిలుస్తుందని మంత్రి చెప్పారు. కొంపల్లిలోని ఆస్పిషియస్ కన్వెన్షన్ సెంటర్లో రూఫ్ అండ్ ఫ్లోర్ ప్రాపర్టీ షోను కాంగ్రెస్ నేత మైనంపల్లి హన్మంతరావుతో కలిసి శ్రీధర్బాబు ప్రారంభించారు. బిల్డర్లు, రియల్ ఎస్టేట్ డెవలపర్లతో మాట్లాడారు. రెచ్చగొట్టేవారి మాటలు విని ఆందోళన చెందొద్దని సూచించారు. ప్రాపర్టీ షోలో 15 మంది డెవలపర్లు సుమారు 100 ప్రాజెక్టులను ప్రదర్శించారు. అపర్ణా కన్స్ట్రక్షన్స్, ప్రైమార్క్, సాకేత్ డెవలపర్స్, సుబిషి ఇన్ఫ్రా, శిల్పా ఇన్ఫ్రాటెక్, మోడీ బిల్డర్స్, శాంతా శ్రీరామ్, గోల్డెన్ కీ, గ్రోత్ స్టోరీస్, లెక్సస్ గ్రూప్, ఎస్ క్యూబ్, తదితర సంస్థలు షోలో పాల్గొన్నాయి. ఆదివారం కూడా ప్రాపర్టీ షో కొనసాగనున్నది.
