కాసుల కక్కుర్తి కోసమే ప్రాజెక్టుల రీడిజైన్ : ఉత్తమ్ కుమార్ రెడ్డి

బీఆర్ఎస్ సర్కార్పై ఇరిగేషన్ మంత్రి ఉత్తమ్ ఫైర్
రాజీవ్, ఇందిరా సాగర్లను మార్చి సీతారామ ప్రాజెక్టు కట్టారు 
రూ.3,500 కోట్లతోనే పూర్తయ్యేదాన్ని.. రూ.18,286 కోట్లకు పెంచారు
ప్రాజెక్టుకు కనీసం సీడబ్ల్యూసీ అనుమతులూ తీసుకురాలేదని కామెంట్

హైదరాబాద్, వెలుగు: కాసుల కక్కుర్తి కోసమే గత బీఆర్ఎస్సర్కారుప్రాజెక్టులను రీ డిజైన్ చేసిందని ఇరిగేషన్శాఖ మంత్రి ఉత్తమ్ కుమార్ రెడ్డి మండిపడ్డారు. సీతారామ ప్రాజెక్ట్కూడా రీ డిజైన్ చేసిందేనన్నారు. వైఎస్సార్ హయాంలో రూ.3,505 కోట్ల అంచనా వ్యయంతో రాజీవ్సాగర్దుమ్ముగూడెం, ఇందిరా సాగర్ లిఫ్ట్ ఇరిగేషన్ స్కీములను చేపట్టారని.. అవి పూర్తయితే కాంగ్రెస్కు పేరొస్తుందన్న ఉద్దేశంతో సీతారామ లిఫ్ట్ఇరిగేషన్ పేరిట ప్రాజెక్టును రీడిజైన్ చేశారని విమర్శించారు. అంచనా వ్యయాన్ని ఒక్కసారిగా రూ.18,286 కోట్లకు పెంచారని అన్నారు.

అంతేకాకుండా ఆయకట్టును 4 లక్షల ఎకరాల నుంచి 3.29 లక్షలకు తగ్గించేశారని దుయ్యబట్టారు. మంగళవారం ఆయన మంత్రి పొంగులేటి శ్రీనివాస్ రెడ్డితో కలిసి జలసౌధలో మీడియాతో మాట్లాడారు. సీతారామ ప్రాజెక్టుకు తొలుత రూ.7,900 కోట్లకే పరిపాలనా అనుమతులు ఇచ్చారని, ఆ తర్వాత ఒకసారి రూ.13 వేల కోట్లు, మరోసారి రూ.18,286 కోట్లకు పెంచారని.. బీఆర్ఎస్ పాలకుల కాసుల కక్కుర్తికి ఇదే నిదర్శనమని మంత్రి విమర్శించారు. వాళ్లు దిగిపోయే నాటికి ప్రాజెక్టుకు చేసిన ఖర్చు కేవలం రూ.7,436 కోట్లేనని, మొత్తం అంచనా వ్యయంలో అది కేవలం 39 శాతమేనని అన్నారు.

అలాంటది బీఆర్ఎస్హయాంలోనే ప్రాజెక్టు 90 శాతం పూర్తయిందని హరీశ్ రావు ఎలా అంటారని నిలదీశారు. రాజీవ్సాగర్, ఇందిరాసాగర్ స్కీములకు అప్పట్లోనే రూ.1,948 కోట్ల విలువైన పనులు చేశారని, మరో రూ.1,500 కోట్లు ఖర్చు పెట్టి ఉంటే ఆ ప్రాజెక్టు పూర్తయి 4 లక్షల ఎకరాలకు నీళ్లొచ్చేవని మంత్రి ఉత్తమ్ గుర్తుచేశారు. అంతేకాకుండా బీఆర్ఎస్ హయాంలోనే సీతారామ ప్రాజెక్టుకు సీడబ్ల్యూసీ అనుమతులు వచ్చాయని హరీశ్ రావు పచ్చి అబద్ధాలు చెప్పారని మంత్రి విమర్శించారు. కాంగ్రెస్ అధికారంలోకి వచ్చాక తనతో పాటు డిప్యూటీ సీఎం భట్టి విక్రమార్క, మంత్రులు పొంగులేటి శ్రీనివాస్ రెడ్డి, తుమ్మల నాగేశ్వర్ రావు, అధికారులతో కలిసి ఢిల్లీకి వెళ్లి ఈ ఏడాది జనవరి 5న సీడబ్ల్యూసీ అనుమతులు తెచ్చుకున్నామని చెప్పారు.

గత ప్రభుత్వం కాస్ట్ బెనిఫిట్ రేషియోనూ పట్టించుకోలేదన్నారు. జీఆర్ఎంబీ నుంచి ప్రాజెక్టుకు పూర్తి స్థాయిలో అనుమతులు వచ్చాయన్నారు. ప్రాజెక్టుకు 67 టీఎంసీల జలాల కేటాయింపులు చేయించామని, అది తమ కాంగ్రెస్ ప్రభుత్వ ఘనతేనని ఉత్తమ్స్పష్టం చేశారు. ఎల్లంపల్లి నుంచి హైదరాబాద్కు నీళ్లు తరలించింది కాంగ్రెస్ ప్రభుత్వమేనని.. కానీ, అధికారంలోకి వచ్చిన నెలకే ఆ నీళ్లను కేటీఆర్ నెత్తిన చల్లుకుని సిటీ అంతటా హోర్డింగ్స్పెట్టుకున్నారని ఎద్దేవా చేశారు.

వాళ్లు పూర్తి చేసింది పంప్హౌస్లే

బీఆర్ఎస్ హయాంలో సీతారామ ప్రాజెక్టులో పూర్తి చేసింది కేవలం పంప్హౌస్లేనని మంత్రి ఉత్తమ్ చెప్పారు. వాటిని కూడా కమీషన్లు వస్తాయనే పూర్తి చేశారని విమర్శించారు. అయితే, వాటికి కనీసం కరెంట్ కనెక్షన్ కూడా ఇవ్వలేదని మండిపడ్డారు. తమ హయాంలోనే అన్ని ప్యాకేజీల పనులను పూర్తి చేస్తున్నామని చెప్పారు. ఇప్పటిదాకా ప్యాకేజీ 1 నుంచి ప్యాకేజీ 5 వరకు పనులను పూర్తి చేశామన్నారు. 2026 ఆగస్టు 15 నాటికి ప్రాజెక్టును పూర్తి స్థాయిలో ప్రారంభిస్తామన్నారు. బీఆర్ఎస్ హయాంలో ఇరిగేషన్ను సర్వనాశనం చేస్తే.. తాము సిస్టమాటిక్గా ముందుకెళుతూ బాగుచేస్తున్నామన్నారు.

కాళేశ్వరానికి రూ.94 వేల కోట్లు ఖర్చు పెట్టి లక్ష ఎకరాలకే నీళ్లిచ్చారన్నారు. సీతారామకు రూ.8 వేల కోట్లు ఖర్చు చేసినా ఒక్క ఎకరాకూ నీళ్లివ్వలేదని మండిపడ్డారు. ఎస్ఎల్బీఎసీ, డిండి, పాలమూరు రంగారెడ్డి వంటి ప్రాజెక్టులను మూలకు పడేశారని గుర్తు చేశారు. మేడిగడ్డ బ్యారేజీకి జరిగిన నష్టం కూడా తీవ్రంగానే ఉందని మంత్రి ఉత్తమ్ చెప్పారు.

అన్నారం, సుందిళ్ల ప్రాజెక్టుల్లోనూ సీకెంట్ పైల్స్లో తీవ్రమైన సమస్యలున్నాయంటూ ఎన్డీఎస్ఏ తమకు చెప్పిందని పేర్కొన్నారు. బ్యారేజీల విషయంలో కేసీఆరే అన్నీ చేశారన్నారు. డిజైన్ల నుంచి నిర్మాణం వరకు ఇంజినీర్లు చేయాల్సిన పనిని ఆయనే చేశారని విమర్శించారు. మేడిగడ్డ బ్యారేజీ కింద భారీ గొయ్యి పడితే గ్రౌటింగ్ చేయడమూ కష్టంగా మారిందని గుర్తు చేశారు. సుంకిశాల ప్రాజెక్టు రిటెయినింగ్ వాల్ కూలిన ఘటనలో నిర్లక్ష్యం వహించిన అధికారులు, కాంట్రాక్టర్చర్యలు తప్పవన్నారు.

మోటార్లు పెట్టి కనీసం డ్రైరన్ కూడా చేయలే: పొంగులేటి

సీతారామ ప్రాజెక్టులో బీఆర్ఎస్ వాళ్లు పంప్హౌస్లు పెట్టి, మోటార్లు బిగించి వదిలేశారని మంత్రి పొంగులేటి శ్రీనివాస్ రెడ్డి అన్నారు. కమీషన్లు రావన్న ఉద్దేశంతో కనీసం ఆ మోటార్ల డ్రైరన్ కూడా చేయలేదన్నారు. మిషన్ కాకతీయతో 35 వేల చెరువుల్లోని చెట్లను కొట్టేసి.. ఆ చెరువులను వాళ్లే కట్టినట్టుగా చెప్పుకున్నారన్నారు. కృష్ణా పరీవాహక ప్రాంతానికి గోదావరి నీళ్లను తామే తీసుకొస్తామని స్పష్టం చేశారు. ఎన్నికలొచ్చినప్పుడే వారికి డబుల్ బెడ్రూం ఇండ్లు గుర్తొచ్చేవన్నారు.

గతంలో కాంగ్రెస్ హయాంలో 18 లక్షల ఇండ్లను ఇందిరమ్మ ఇండ్ల కింద కట్టిస్తే.. బీఆర్ఎస్ హయాంలో ఇచ్చింది కేవలం 1.38 లక్షలేనన్నారు. తమ ప్రభుత్వం మాట మీద నిలబడుతుందని మంత్రి స్పష్టం చేశారు. ఖమ్మం ప్రజల పౌరుషమేంటో హరీశ్ రావు తన మామను అడిగి తెలుసుకుంటే మంచిదన్నారు. 2014, 2018, 2023 ఎన్నికల్లో ఖమ్మం జిల్లాలో బీఆర్ఎస్ గెలిచింది ఒక్క సీటు మాత్రమేనన్నారు. ఖమ్మం ప్రజలను ఎంత తక్కువ గోకితే హరీశ్రావుకు అంత మంచిదన్నారు.