ఐదేండ్లలో సాగునీటి రంగంలో మార్పు చూస్తారు : ఉత్తమ్​కుమార్​రెడ్డి

• ఉమ్మడి జిల్లాలో  కొత్త ఆయకట్టు వస్తుంది

కామారెడ్డి, వెలుగు: ఉమ్మడి నిజామాబాద్​ జిల్లాలో ఐదేండ్లలో ఇరిగేషన్ పరంగా మార్పు చూస్తారని,  కొత్త  ఆయకట్టు వస్తుందని రాష్ర్ట ఇరిగేషన్, సివిల్​సప్లయ్​శాఖల మంత్రి ఉత్తమ్​కుమార్​రెడ్డి అన్నారు.  శుక్రవారం నిజాంసాగర్​ ప్రాజెక్టు నీటిని మంత్రి విడుదల చేసి ప్రాజెక్టును పరిశీలించారు. మంత్రికి జిల్లాలో ఇరిగేషన్​ ప్రాజెక్టుల పరిస్థితిని సీఈ శ్రీనివాస్ ​వివరించారు. అనంతరం జుక్కల్, బాన్సువాడ, బోధన్​ ఎమ్మెల్యేలు తోట లక్ష్మీకాంతారావు, పోచారం శ్రీనివాస్​రెడ్డి,  సుదర్శన్​రెడ్డి మాట్లాడారు. జిల్లాలో ఇరిగేషన్​ ప్రాజెక్టు పనులు పూర్తి చేయాలని మంత్రిని కోరారు. 

నాగమడుగు, లెండి ప్రాజెక్టు,  ప్యాకేజీ 22 పనులు చేపట్టి బీడు భూములకు  సాగునీరు ఇవ్వాలని కోరారు. నిజాంసాగర్​ కాల్వలకు  నాగమడుగు లిఫ్ట్​​ ఇరిగేషన్​ పూర్తి చేస్తామన్నారు.  అంతరాష్ర్ట ప్రాజెక్టు అయిన లెండిపై మహారాష్ర్ట అధికారులతో  మాట్లాడతానన్నారు.   జాకోరా, చకోరా వద్ద సబ్​స్టేషన్​ ఏర్పాటు చేస్తామన్నారు.  22వ ప్యాకేజీ పనులను యుద్ధ ప్రాతిపదికన  పూర్తి చేస్తామని చెప్పారు. త్వరలో ఉమ్మడి నిజామాబాద్​ జిల్లా ప్రజాప్రతినిధులతో ఇరిగేషన్​ ప్రాజెక్టు పనులపై  రివ్యూ మీటింగ్​ ఏర్పాటు చేస్తామన్నారు.

  పనుల విషయంలో ఏ విధంగా ముందుకెళ్లాలనే అంశంపై చర్చించి  తగిన చర్యలు తీసుకుంటామని తెలిపారు.   స్టేట్ ఆగ్రో ఇండస్ర్టీస్​ చైర్మన్​ కాసుల బాల్​రాజు, ఇరిగేషన్​ శాఖ ఈఎన్​సీ అనిల్,  కలెక్టర్​ఆశిశ్​ సంగ్వాన్,  సబ్​కలెక్టర్​ కిరణ్మయి, మాజీ ఎమ్మెల్యే ఏనుగు రవీందర్​రెడ్డి,  డీసీసీ ప్రెసిడెంట్​ కైలాస్​ శ్రీనివాస్​రావు, ఆయా శాఖల ఆఫీసర్లు, లీడర్లు తదితరులు పాల్గొన్నారు.