- 22 వేల కోట్ల బడ్జెట్లో 11 వేల కోట్లు అప్పులకే పోతున్నయ్: ఉత్తమ్
- నెలాఖరులోపు ఉద్యోగుల ప్రమోషన్లు, ట్రాన్స్ఫర్ల ప్రక్రియ పూర్తి
- ఏఈఈ అసోసియేషన్ డైరీని ఆవిష్కరించిన మంత్రి
హైదరాబాద్, వెలుగు: గత సర్కారు ఇరిగేషన్ డిపార్ట్మెంట్ను సర్వనాశనం చేసిందని.. పదేండ్లలో దారితప్పిన శాఖను గాడిలో పెడుతున్నామని ఆ శాఖ మంత్రి ఉత్తమ్ కుమార్ రెడ్డి అన్నారు. ఇరిగేషన్ ప్రాజెక్టులపై గత ప్రభుత్వం తక్కువ కాలపరిమితితో ఎక్కువ వడ్డీలకు తీసుకున్న లోన్లను.. తక్కువ వడ్డీ ఎక్కువ కాలపరిమితితో కూడిన లోన్లుగా మార్చేందుకు ప్రయత్నిస్తున్నామని చెప్పారు. గత ప్రభుత్వ నిర్లక్ష్యానికి ఇరిగేషన్ శాఖ బడ్జెట్రూ.22 వేల కోట్లలో.. రూ.11 వేల కోట్లు అప్పులకే పోతున్నాయన్నారు.
బుధవారం జలసౌధలో అసోసియేషన్ ఆఫ్ తెలంగాణ అసిస్టెంట్ఎగ్జిక్యూటివ్ ఇంజనీర్స్ డైరీని ఆయన ఆవిష్కరించారు. అనంతరం ఆయన మాట్లాడుతూ.. ఈ నెలాఖరులోపు డిపార్ట్మెంట్లో ప్రమోషన్లు, బదిలీల ప్రక్రియ పూర్తి చేస్తామన్నారు. నీటిపారుదల శాఖ సలహాదారు ఆదిత్యనాథ్ దాస్, ముఖ్య కార్యదర్శి రాహుల్ బొజ్జా, ప్రత్యేక కార్యదర్శి ప్రశాంత్ జీవన్ పాటిల్, ఈఎన్సీ జనరల్ అనిల్ కుమార్, ఈఎన్సీ ఓ అండ్ ఎం విజయభాస్కర్ రెడ్డితో ఫైవ్మెన్ కమిటీ వేశామని, వారు న్యాయపరమైన ఇబ్బందులను అధిగమించి సమస్యలు రాకుండా ప్రమోషన్లు చేపడతామని తెలిపారు.
సిబ్బంది నియామకంపై కసరత్తు..
ఇరిగేషన్ డిపార్ట్మెంట్లో నియామకాలపై గత ప్రభుత్వం దృష్టి పెట్టలేదని, తమ ప్రభుత్వం ఆ దిశగా దృష్టి సారించిందని మంత్రి ఉత్తమ్ తెలిపారు. 700 ఏఈఈలను నియమించామని, 1,800 మంది లష్కర్లను ఔట్సోర్సింగ్పద్ధతిలో తీసుకున్నామని చెప్పారు. మరో 1,300 నియామకాలకు పబ్లిక్ సర్వీస్ కమిషన్కు అనుమతిచ్చామన్నారు. దానిపై ఫాలో అప్ చేయాల్సిందిగా ఈఎన్సీ అనిల్కు సూచించారు. దేశం మొత్తంలోనే తెలంగాణ ఇరిగేషన్ శాఖకు ప్రత్యేక గుర్తింపు ఉందని చెప్పారు.
నాగార్జునసాగర్, శ్రీశైలం, శ్రీరాంసాగర్ వంటి ప్రాజెక్టులను కట్టిన చరిత్ర ఉందన్నారు. అటువంటి గొప్ప ఇంజనీర్లకు వారసులుగా యువ ఇంజనీర్లు ఎదగాలని, అందుకు అనుగుణంగా కష్టపడాలని చెప్పారు. డ్యూటీలో సిన్సియారిటీ, నిబద్ధత, పారదర్శకతతో పనిచేయాలన్నారు. యువత కచ్చితంగా ఫీల్డ్లోనే పనిచేయాలని, కష్టపడి పనిచేసి మంచి ఫలితాలు సాధించిన వారికి కచ్చితంగా గుర్తింపు ఉంటుందని చెప్పారు. కారణం లేకుండా వేరే చోటుకు బదిలీ కావాలని పైరవీలకు ప్రయత్నిస్తే.. గతంలో సీఎం చెప్పినట్టు అడవుల్లోకి వేస్తారని సున్నితంగా చెప్పారు.
మెడికల్ గ్రౌండ్స్, అసాధారణ పరిస్థితులుంటే కచ్చితంగా పరిగణనలోకి తీసుకుంటామని స్పష్టం చేశారు. కాగా, ఈ సందర్భంగా టీజీవో అధ్యక్షుడు ఏలూరి శ్రీనివాస్ రావు.. ఇంజనీర్ల సమస్యలను మంత్రి దృష్టికి తీసుకొచ్చారు. కొన్ని ప్రాజెక్టుల వద్ద పాత క్వార్టర్స్ శిథిలావస్థకు చేరుకున్నాయని, వాటికి హెచ్ఆర్ఏ కట్ చేస్తున్నారని చెప్పారు. ఎంతో కొంత రెంట్ను ఫిక్స్ చేసి హెచ్ఆర్ఏ కట్ కాకుండా చూడాలన్నారు. మూడు నెలల నుంచి కొత్త ఏఈఈలకు జీతాల్లేవని, నాలుగేండ్లుగా టీఏ బిల్లులు పెండింగ్లో ఉన్నాయని, రిటైర్డ్ ఎంప్లాయీస్కు బెనిఫిట్స్ పెండింగ్ ఉన్నాయని చెప్పారు. అయితే, వాటిలో హెచ్ఆర్ఏ వంటి కొన్ని అంశాలనైనా పరిష్కరిస్తామని మంత్రి ఉత్తమ్ హామీ ఇచ్చారు.
