- భయపడేది లేదన్న మీసాల చంద్రయ్య
నిజామాబాద్ రూరల్, వెలుగు : బీజేపీ సీనియర్లీడర్, నిజామాబాద్ జిల్లా ఇన్చార్జి మీసాల చంద్రయ్య వాహనంపై రాళ్ల దాడి జరిగింది. శుక్రవారం నగరంలో జరిగిన పార్టీ సమావేశంలో పాల్గొన్న చంద్రయ్య తన వాహనంలో హైదరాబాద్కు తిరుగు ప్రయాణమయ్యారు. శివారులోని మాధవనగర్వద్ద రైల్వే గేటు పడడంతో సాయిబాబా ఆలయం పక్కన వాహనాన్ని ఆపారు. అదే టైంలో వెనక వైపు నుంచి బైక్పై వచ్చిన ఇద్దరు యువకులు రాళ్లతో చంద్రయ్య వాహనంపై దాడి చేసి పరారయ్యారు. వెనక అద్దాలు పూర్తిగా ధ్వంసం కాగా వెహికల్ లోపల ఉన్న చంద్రయ్య సురక్షితంగా బయటపడ్డారు. డిచ్పల్లి పోలీసులు ఘటనాస్థలికి చేరుకొని వివరాలు అడిగి తెలుసుకున్నారు.ఈ సందర్భంగా చంద్రయ్య మాట్లాడుతూ తన వాహనాన్ని వెంబడిస్తూ వచ్చిన బీఆర్ఎస్గుండాలే ఈ దాడి చేశారని ఆరోపించారు. రాళ్లతో దాడి చేసిన యువకులు ‘కవిత జిందాబాద్, బీఆర్ఎస్ జిందాబాద్’ అంటూ నినాదాలు చేస్తూ పరారయ్యారన్నారు. తాటాకు చప్పుళ్లకు తాము భయపడేది లేదన్నారు. విషయం తెలుసుకున్న బీజేపీ జిల్లా అధ్యక్షుడు బస్వలక్ష్మీనర్సయ్య, నాయకుల రాజశేఖర్రెడ్డి, ప్రమోద్, రాజు, లచ్చన్న దాడిని ఖండించారు.
