హైదరాబాద్, వెలుగు: తెలంగాణ అసెంబ్లీ ఎన్నికల నేపథ్యంలో మిషన్ చాణక్య ఎలక్షన్ స్టడీ సంస్థ స్టేట్ మూడ్ను విడుదల చేసింది. నారాష్ట్రం, నా ఓటు, నా నిర్ణయం పేరుతో చేపట్టిన సర్వేలో బీఆర్ఎస్ హ్యాట్రిక్ కొడుతుందని తేల్చింది. బీఆర్ఎస్కు 44.62 శాతం, కాంగ్రెస్కు 32.71 శాతం, బీజేపీకి 17.6 శాతం ఓట్లు వచ్చే చాన్స్ ఉందని వెల్లడించింది.
ఇప్పటికిప్పుడు రాష్ట్రంలో ఎన్నికలు జరిగితే బీఆర్ఎస్ 72 నుంచి 76, కాంగ్రెస్ 25 వరకు, బీజేపీ 9 నుంచి 10, ఎంఐఎం ఏడు సీట్లు గెలుస్తుందని పేర్కొంది. మేనిఫెస్టో విడుదల తరువాత బీఆర్ఎస్కు మహిళల్లో ఆదరణ పెరిగిందని, అత్యధికంగా 37శాతం మంది నిరుద్యోగులు ఆ పార్టీకి అనుకూలంగా ఉన్నారని చెప్పింది. గ్యారంటీలతో కాంగ్రెస్ కాస్త పుంజుకుందని, అయినప్పటికీ ఆ పార్టీ రెండో స్థానానికే పరిమితం అవుతుందని తెలిపింది. ఆదిలాబాద్, నిజామాబాద్, హైదరాబాద్ జిల్లాల్లో బీజేపీ బలంగా ఉందని తెలిపింది. ఆ పార్టీ మూడో స్థానానికి పరిమితం అవుతుందని వెల్లడించింది.
మిషన్ చాణక్య చైర్మన్ అముక శివకేశవ్ మాట్లాడుతూ కొన్ని నెలల నుంచి స్టేట్ మూడ్ను అబ్జర్వ్ చేస్తున్నామన్నారు. కొన్ని పార్టీలు ఇంకా అభ్యర్థులను ప్రకటించలేదు కనుక వారిని కూడా ప్రకటిస్తే ఎన్నికల సమయానికి ఈ అంచనాలు మారవచ్చని చెప్పారు.
