గచ్చిబౌలి, వెలుగు : మార్నింగ్ టైంలో డెలివరీ బాయ్అవతారం ఎత్తి తాళం ఉన్న ఇండ్లను గుర్తిస్తాడు. రాత్రిపూట వెళ్లి ఇంట్లోని బంగారం, వెండి, నగదు ఎత్తుకెళ్తాడు. పోలీసులకు దొరకకుండా తప్పించుకు తిరిగే బీటెక్ డిస్ కంటిన్యూ చేసిన యువకుడిని మియాపూర్పోలీసులు అరెస్ట్ చేశారు. అతని వద్ద రూ. 16 లక్షల విలువైన బంగారం, వెండి సొత్తును స్వాధీనం చేసుకోగా.. వివరాలను మాదాపూర్ జోన్డీసీపీ జి. వినీత్ తెలిపారు.
ఏపీలోని శ్రీకాకుళం జిల్ల కడకోల మండలం విక్రంపురం గ్రామానికి చెందిన బబ్బాడి అభిలాష్(29) నాగ్పూర్లోని ఓ కాలేజీలో బీటెక్ మెకానికల్ఇంజనీరింగ్చదువు మధ్యలోనే మానేశాడు. హైదరాబాద్కు వచ్చి కేపీహెచ్బీ హెచ్ఎంటీ హిల్స్ లో ఫ్రెండ్స్తో ఉంటున్నాడు. జల్సాలకు అలవాటు పడ్డ అభిలాష్ ఈజీ మనీ కోసం చోరీలను ఎంచుకున్నాడు. తాళం వేసిన ఇండ్లను ఉదయం డెలివరీ బాయ్గా వెళ్లి గుర్తిస్తాడు.
రాత్రిపూట వెళ్లి చోరీ చేస్తాడు. ఇందుకు బాలానగర్ ఇండస్ట్రియల్ఏరియాలో భారీ కట్టర్ను కొనుగోలు చేశాడు. అభిలాష్ ఏడాదిన్నరలో 20 చోరీలు చేశాడు. సొత్తును జైసింగ్అనే వ్యక్తికి అమ్మేస్తాడు. వచ్చిన డబ్బులతో వేరే ప్రాంతాలకు కొన్ని రోజులు వెళ్లి ఎంజాయ్ చేసి వస్తాడు. మియాపూర్ పీఎస్ పరిధిలో వరుస చోరీలపై దర్యాప్తు చేపట్టిన పోలీసులు నిందితుడిని అరెస్ట్ చేశాడు. అతడి వద్ద 26 తులాల బంగారు నగలు, 300 గ్రాముల వెండి నగలు, 2 బైక్లు స్వాధీనం చేసుకున్నారు. సమావేశంలో ఏడీసీపీ నర్సింహారెడ్డి, మియాపూర్ ఏసీపీ, ఇన్స్పెక్టర్ పాల్గొన్నారు.
