పెబ్బేరు, వెలుగు: వనపర్తి జిల్లా పెబ్బేరు ఎంజేపీటీ బీసీడబ్ల్యూఆర్ స్కూల్లో విద్యార్థినులను పీఈటీ ఐరన్స్కేల్తో చితకబాదింది. విద్యార్థినులు తెలిపిన వివరాల ప్రకారం.. వర్షాలు కురుస్తుండడంతో మూడు రోజులు సెలవులు వచ్చాయి. ప్రిన్సిపాల్ది హైదరాబాద్ కావడంతో ఆమె లీవ్లో వెళ్లారు. మొహర్రం పండుగ సందర్భంగా శనివారం ఉదయం పీరీలు స్కూల్ ముందు నుంచి వెళ్తుండగా, వాటిని చూసేందుకు విద్యార్థినులు అంతా బయటికి వచ్చారు. అంతకుముందే గెస్ట్ పీఈటీ శివమ్మ మిద్దెపై ఆరబెట్టుకున్న బట్టలు తెచ్చుకోమని చెప్పింది. ఆమె చెప్పిన మాటలు పట్టించుకోకుండా పిల్లలంతా పీరీలను చూడడానికి గేట్ వద్దకు రావడంతో, ఐరన్స్కేల్తో అందరినీ కొట్టింది.
ఇందులో మహబూబ్నగర్ జిల్లా హన్వాడ మండలం రామన్నపల్లికి చెందిన ఆరో తరగతి స్టూడెంట్వర్షలతకు వీపుపై కంది పోయింది. టీచర్ కొట్టిన విషయాన్ని స్టూడెంట్స్ స్కూలు దగ్గరకు వచ్చిన మీడియాకు వివరించారు. దాంతో విలేకరులు ప్రిన్సిపాల్ స్వర్ణలతను ఫోన్లో సంప్రదించగా చర్యలు తీసుకుంటామని చెప్పారు. జిల్లాకన్వీనర్ మదనాచారికి ఈ విషయం తెలపడంతో గెస్ట్ పీఈటీ శివమ్మను విధుల నుంచి తొలగిస్తున్నట్లు తెలిపారు.
