నల్గొండ అర్బన్ : ఓటమి భయంతో ఎమ్మెల్యే భూపాల్రెడ్డి చిల్లర రాజకీయాలకు పాల్పడుతున్నాడని బీఆర్ఎస్ అసమ్మతి నేత, ఆర్కేఎస్ ఫౌండేషన్ చైర్మన్ పిల్లి రామరాజు యాదవ్ ఆరోపించారు. నల్గొండ ఎమ్మెల్యే కంచర్ల భూపాల్రెడ్డి, పోలీసుల తీరును నిరసిస్తూ మంగళవారం నల్గొండలోని రామాలయం నుంచి ఎస్పీ ఆఫీసు వరకూ నల్ల కండువాలతో భారీ ర్యాలీ నిర్వహించారు. ఈ సందర్భంగా ‘ కంచర్ల భూపాల్రెడ్డి అరాచకాల నుంచి నల్గొండ నియోజకవర్గాన్ని కాపాడుకుందాం’ అంటూ ప్లెక్సీలతో ప్రదర్శన నిర్వహించారు.
తర్వాత ఏఆర్ ఏఎస్పీ హనుమంతరావుకు ఫిర్యాదు చేశారు. తన ఫ్లెక్సీలు చించివేసిన ప్రాంతానికి వెళ్లి ఎమ్మెల్యే అనుచరులు చేసిన పనిని చూపించారు. రామరాజు యాదవ్ మాట్లాడుతూ తాను నల్గొండ నియోజకవర్గంలోని వివిధ గ్రామాలు, పట్టణ పరిధిలోని వివిధ వార్డుల్లోని ప్రజలకు వినాయక విగ్రహాలు ఇప్పించానని, వాటి పూజా కార్యక్రమాల్లో పాల్గొనేందుకు కార్యకర్తలతో వెళ్తున్న తనను ఎమ్మెల్యే భూపాల్రెడ్డి డైరెక్షన్ లో పోలీసులు అడ్డుకుంటున్నారని ఆరోపించారు.
తనకు ప్రజల నుంచి వస్తున్న ఆదరణను చూసి తట్టుకోలేక ఎమ్మెల్యే ఇదంతా చేయిస్తున్నాడన్నారు. బీసీ బిడ్డగా పుట్టడమే తాను చేసిన పాపమా అని ప్రశ్నించారు. తన అనుచరులపై కేసులు పెట్టడం సరైందికాదన్నారు. హైదరాబాద్రౌడీలతో నల్గొండలో ఎమ్మెల్యే ర్యాలీలు నిర్వహించి షో చేశాడని, వారితో తనను చంపించాలని కుట్ర చేస్తున్నారన్నారు.
ఎమ్మెల్యే సొంత ఊరిలోనే ఆయనకు ప్రజాబలం లేదని, ఆ ఊరి జనాలే తన దగ్గరకు వస్తున్నారని, పోలీస్ఎస్కార్ట్ లేకుండా ప్రజా క్షేత్రంలో తిరిగితే ఆయన ఏమిటో తెలుస్తుందన్నారు. బీసీ , యాదవ సంఘం నాయకులు అల్లి వేణుయాదవ్, అల్లి సుభాష్ యాదవ్, కృష్ణంరాజు యాదవ్ పాల్గొన్నారు.
