- ఎమ్మెల్యే ధన్ పాల్ సూర్యనారాయణ
నిజామాబాద్, వెలుగు : సీఎంగా రేవంత్రెడ్డి బాధ్యతలు స్వీకరించాక ఆరు నెలల్లో కుర్చీ కాపాడుకోవడానికే 11 సార్లు ఢిల్లీ ప్రదక్షిణలు చేశారని అర్బన్ ఎమ్మెల్యే ధన్ పాల్ సూర్యనారాయణ విమర్శించారు. శుక్రవారం బీజేపీ జిల్లా పార్టీ ఆఫీస్లో ఆయన మీడియాతో మాట్లాడారు. ప్రజా సమస్యలను గాలికొదిలేసి బీఆర్ఎస్ హయాంలో జరిగిన కుంభకోణాల నుంచి కేసీఆర్ను కాపాడడానికి సీఎం పావులు కదుపుతున్నారన్నారు. కరెంట్ కొనుగోలు, కాళేశ్వరం, గొర్రెల పంపిణీ కుంభకోణాలు, ఫోన్ ట్యాపింగ్‌‌‌‌‌‌‌‌తో కేసీఆర్ రాజకీయ జీవితం పూర్తిగా మసకబారిపోయిందన్నారు.
ప్రైవేట్ విద్యాసంస్థల ఫీజు దోపిడీని ఆపేవారు లేకుండా పోయారన్నారు. సీఎం రేవంత్, డిప్యూటీ సీఎం మల్లు భట్టి విక్రమార్క సొంత జిల్లాల్లో ప్రాజెక్టు పైలెట్గా ఇంటిగ్రేటెడ్‌ స్కూళ్ల నిర్మాణం జరుగుతుందన్నారు. ఏబీవీపీ కార్యకర్తలు బంద్‌‌‌‌‌‌‌‌కు పిలుపునిస్తే పోలీసులు కేసులు నమోదు చేయడం ఏమిటన్నారు. సీఎం గులాంలుగా పనిచేసే పోలీసు ఆఫీసర్లు జిల్లా విడిచి వెళ్లాలన్నారు. హోం శాఖను తన వద్ద పెట్టుకున్న రేవంత్రెడ్డి ప్రశ్నించే గొంతుకలను అణిచివేస్తున్నారని ధ్వజమెత్తారు.
ఆరు గ్యారెంటీలను చూపి అధికారం చేపట్టిన రేవంత్ ప్రజలకు గాడిద గుడ్డు ఇస్తున్నారని ఎద్దేవా చేశారు. ఎంఐఎం అధినేత అసదుద్దీన్ ఓవైసీ పార్లమెంట్ సాక్షిగా దేశ రాజ్యాంగాన్ని అవహేళన చేశారని బేషరతు క్షమాపణ చెప్పాలని డిమాండ్చేశారు. పలువురు బీజేపీ లీడర్లు ఉన్నారు.
