- చెన్నూరులో అభివృద్ధి అంశాలపై రివ్యూ
కోల్బెల్ట్/చెన్నూరు/జైపూర్, వెలుగు : తెలంగాణ వచ్చిన టైంలో సింగరేణిలో 62 వేల మంది కార్మికులు ఉంటే ఇప్పుడు 39 వేలకు తగ్గారని.. కేసీఆర్ సీఎం అయ్యాక 23వేల ఉద్యోగాలను తొలిగించాడని చెన్నూరు ఎమ్మెల్యే డాక్టర్ జి.వివేక్వెంకటస్వామి విమర్శించారు. మంగళవారం ఐఎన్టీయూసీ, కాంగ్రెస్ లీడర్లతో కలిసి ఆయన మందమర్రి ఏరియాలోని బొగ్గు గనులు, డిపార్ట్మెంట్లు, జైపూర్లోని సింగరేణి పవర్ ప్లాంట్ కార్మికులను కలిశారు. ఈ సందర్భంగా మాట్లాడుతూ.. సింగరేణి సంస్థ రూ.వేల కోట్ల లాభాల్లో ఉందని అంతా అనుకుంటున్నారని, కానీ పరిస్థితులు ఇందుకు భిన్నంగా ఉన్నాయన్నారు.
బీఆర్ఎస్ సర్కార్, టీబీజీకేఎస్ కారణంగా సంస్థ అప్పులపాలైందని ఆరోపించారు. నిధుల్లేకపోవడంతో కొత్త గనులు తవ్వలేకపోయారని, కనీసం కొత్త క్వార్టర్లు కూడా నిర్మించలేని దుస్థితికి తీసుకొచ్చారని మండిపడ్డారు. కార్మికుల హక్కుల కోసం పోరాడే ఐఎన్టీయూసీని ఆదరించి గెలిపించాలని కోరారు. కాకా వెంకటస్వామి చొరవతోనే జైపూర్లో 1200 మెగావాట్ల థర్మల్ పవర్ ప్లాంట్ ఏర్పాటైందన్నారు. ఈ సందర్భంగా జైపూర్ పవర్ప్లాంట్కు చెందిన పలువురు టీబీజీకేఎస్ లీడర్లు పలువురు వివేక్ వెంకటస్వామి సమక్షంలో ఐఎన్టీయూసీలో చేరారు.
కార్యక్రమంలో ఐఎన్టీయూసీ లీడర్లు కాంపెల్లి సమ్మయ్య, దేవి భూమయ్య, నరేందర్, మండ భాస్కర్, మిట్ట సూర్యనారాయణ, వెంకటస్వామి, శంకర్రావు, సత్యనారాయణ, రాకేశ్, రాజు, కాంగ్రెస్ లీడర్లు చల్లా సత్యనారాయణ రెడ్డి, ఫయాజ్, విశ్వంబర్ రెడ్డి, శ్రీనివాస్ రెడ్డి గడ్డం రజిత పాల్గొన్నారు.
బాధిత కుటుంబాలకు పరామర్శ
చెన్నూరు నియోజకవర్గంలోని కోటపల్లి మండలం జనగామ గ్రామంలో ఇటీవల మృతి చెందిన తలేండి పోసక్క, నర్సయ్య, తెర్రం లక్ష్మయ్య కుటుంబాలను ఎమ్మెల్యే వివేక్ పరామర్శించారు. ఆయన వెంట ఉమ్మడి జిల్లా జెడ్పీ మాజీ వైస్ చైర్మన్ మూల రాజిరెడ్డి, హేమమంత రెడ్డి, బాపురెడ్డి, పోటు రామిరెడ్డి, రఘునందన్ రెడ్డి, మాదంరవి కళావతి, మహేశ్ తివారి, కురుమ రాజమల్లగౌడ్, సర్పంచ్లు, ఎంపీటీసీలు ఉన్నారు.
అధికారులు సమన్వయంతో పనిచేయాలి
ప్రజల సమస్యల పరిష్కారం, అభివృద్ధి పనుల విషయంలో అలసత్వం వహించొద్దని ఎమ్మెల్యే వివేక్ వెంకటస్వామి అధికారులను హెచ్చరించారు. చెన్నూరు నియోజకవర్గం కేంద్రంలోని ఫారెస్ట్ఆఫీస్లో ప్రజాపాలన కార్యక్రమంలో భాగంగా ఏర్పాటు చేసిన రివ్యూ మీటింగ్లో పాల్గొన్నారు. ఈ సందర్భంగా వివిధ అభివృద్ధి అంశాలపై సంబంధిత అధికారులతో సమీక్ష జరిపారు. కాంగ్రెస్ ప్రభుత్వం ఏర్పడి 23 రోజులైనా నియోజకవర్గం ఆఫీసర్లు తన దృష్టికి ఎలాంటి సమస్యలను తీసుకురాలేదన్నారు.
ప్రజాపాలన కార్యక్రమాన్ని విజయవంతంగా పూర్తి చేయాలని, ప్రజలు ఇబ్బందులు పడకుండా ఏర్పాట్లు చేయాలన్నారు. ఆర్జీలను పెండింగ్లో పెట్టకుండ పరిష్కరించాలన్నారు. రివ్యూ మీటింగ్లో డీఆర్డీవో శేషాద్రి, వెటర్నరీ జేడీ రమేశ్, ఎఫ్డీవో రమేశ్, ఎమ్మార్వోలు ఇతర ఆఫీసర్లు పాల్గొన్నారు.
