అచ్చంపేట; వెలుగు: ఫ్లెక్సీల్లో తన ఫొటో పెట్టనీయలేదంటూ కాంగ్రెస్ పార్టీకి చెందిన ఉపసర్పంచ్ను అచ్చంపేట ఎమ్మెల్యే గువ్వల బాలరాజు బెదిరించారు. ‘ నీ తీరు మార్చుకోకపోతే అంతు చూస్తా’ అంటూ వార్నింగ్ ఇచ్చారు. ఉప సర్పంచ్ కథనం ప్రకారం..బల్మూర్ మండలం జినుకుంటలో ఈ నెల 25న ఓ ఆలయ ధ్వజస్తంభ ప్రతిష్ఠాపన కార్యక్రమం నిర్వహించారు. ఈ సందర్భంగా గ్రామంలో పార్టీలకు చెందిన ఫ్లెక్సీలు కాకుండా కేవలం దేవుడి ఫొటోలతో కూడిన ఫ్లెక్సీలను మాత్రమే ఏర్పాటు చేయాలని తీర్మానించారు. అయితే, కొందరు బీఆర్ఎస్ నేతలు ఎమ్మెల్యే గువ్వల బాలరాజు ఫొటోతో కూడిన ఫ్లెక్సీని ఏర్పాటు చేస్తుండగా గ్రామస్తులు అభ్యంతరం తెలిపారు. ఈ విషయమై సోమవారం ఉప సర్పంచ్ కృష్ణయ్యకు గువ్వల బాలరాజు ఫోన్ చేశారు. ‘ఏ కొడుకు నా ఫ్లెక్సీ వద్దనేది? రికార్డు చేస్తున్నవా చేస్కో..పోనియ్ వైరల్ కానియ్..నీ వైఖరి మారుతనేమో మంచిది. లేకపోతే బాగుండదు. మేమేమన్నా దొంగలమా? నా ఫొటో పెట్టనియ్యవారా? ఆ రోజు కూడా చూసిన నీ బిల్డప్లు..నీ పోజులు..నేను కింద నిలవడితే..నవ్వుకుంట..ఎక్కిరించినట్టు మొతబరిలాగ ఉంటవా? అంత రుబాబా రా... దేవునికాడ కాదు దేవున్ని ఆనుకునే ఫ్రేం పెట్టి ఫ్లెక్సీ కడతా..ముట్టుకో చూస్తా’ అని బెదిరించారు.
పోలీసుల అదుపులో ఫ్లెక్సీల షాపు ఓనర్ ..
ఫ్లెక్సీలు ప్రింట్ చేయలేదని షాప్ ఓనర్ను అచ్చంపేట పోలీసులు పట్టుకుపోయి కొట్టారని తెలుస్తోంది .మంగళవారం మంత్రి పర్యటన ఉండగా ఫ్లెక్సీలు తయారు చేయించాలని టౌన్లోని ఆర్ఎస్ డిజిటల్స్ ఫ్లెక్సీ బ్యానర్స్ షాప్కు సోమవారం కొందరు బీఆర్ఎస్ నేతలు వెళ్లారు. ఆ టైంలో ఓనర్ మహేశ్ లేకపోవడంతో పని చేసేందుకు వర్కర్స్ నిరాకరించారు. దీంతో సోమవారం రాత్రి 8 గంటలకు ఇంటికి వచ్చిన మహేశ్ ను పోలీసులు స్టేషన్కు తీసుకువెళ్లి కొట్టినట్టు తెలిసింది. మహేశ్ కుటుంబసభ్యులు, కొందరు లీడర్లు పీఎస్కు వెళ్లి ఎస్ఐతో మాట్లాడగా ఎమ్మెల్యేను తిట్టినందుకే మహేశ్ను తీసుకువచ్చినట్లు చెప్పారు. తర్వాత అర్ధరాత్రి వేళలో వదిలేశారు. ఈ విషయంపై ఎస్ఐని వివరణ కోరేందుకు ప్రయత్నించగా అందుబాటులోకి రాలేదు.
