- వరుస హింసాత్మక ఘటనలే నిదర్శనం
హైదరాబాద్, వెలుగు: రాష్ట్రంలో శాంతి భద్రతలు క్షీణించాయని మాజీ మంత్రి, సిద్దిపేట ఎమ్మెల్యే హరీశ్ రావు ఆరోపించారు. వరుస హత్యలు, అత్యాచారాలు, హింసాత్మక ఘటనలే ఇందుకు నిదర్శనమని బుధవారం ఆయన ట్వీట్ చేశారు. ‘‘గడిచిన వారం రోజుల్లోనే ఎన్నో ఘటనలు జరిగాయి. నారాయణపేట జిల్లా ఉట్కూరు మండలంలో అందరూ చూస్తుండగానే సంజీవ్ అనే వ్యక్తిని కర్రలతో కొట్టి చంపారు.
హైదరాబాద్ నడిబొడ్డున బాలాపూర్ లో సమీర్ అనే యువకుడిని దారుణంగా పొడిచి చంపారు. పెద్దపల్లి జిల్లాలో ఆరేండ్ల చిన్నారిపై జరిగిన అత్యాచారం, హత్య ఘటన మరచిపోక ముందే మరో దారుణం చోటుచేసుకున్నది. రక్షించాల్సిన పోలీసే తోటి మహిళా కానిస్టేబుల్పై అత్యాచార ఘటన భూపాలపల్లి జిల్లాలో జరగడం అత్యంత హేయమైన చర్య. దీన్ని తీవ్రంగా ఖండిస్తున్నా. రాష్ట్రంలో.. కాంగ్రెస్ పార్టీ అధికారంలోకి వచ్చిన ఆరు నెలల్లోనే భద్రత ప్రశ్నార్థకమవడం బాధాకరం”అని హరీశ్ రావు ఆందోళన వ్యక్తం చేశారు.
