కూసుమంచి, వెలుగు : మేం చాలాకాలంగా గుడిసెల్లోనే బతుకుతున్నం. మాకు డబుల్ బెడ్రూం ఇండ్లు ఇప్పించండి’ అంటూ ఓ నిరుపేద మహిళ సోమవారం పాలేరు ఎమ్మెల్యే కందాల ఉపేందర్రెడ్డి కాళ్లపై పడబోయింది. ఖమ్మం జిల్లా కూసుమంచి మండలం నాయకన్గూడెంలో సోమవారం హరితోత్సవం నిర్వహించగా దీనికి ఎమ్మెల్యే ముఖ్య అతిథిగా హాజరయ్యారు. ఈ సందర్భంగా సుమారు 30 మంది మహిళలు ఎమ్మెల్యే దగ్గరకు వచ్చి తమ గోడు వెల్లబోసుకున్నారు.
తామంతా నాయకన్గూడెంలోని ఎన్ఎస్పీ స్థలంలో మూడేండ్లుగా గుడిసెలు వేసుకుని ఉంటున్నామని, కూలి పని చేసుకుని బతుకుతున్నామన్నారు. తమకు డబుల్బెడ్రూం ఇండ్లు ఇచ్చి ఆదుకోవాలన్నారు. ఓ మహిళ ఎమ్మెల్యే కాళ్లపై పడబోగా ఆపారు. డీఆర్డీఏ పీడీ విద్యాచందన, ఎంపీపీ బానోతు శ్రీనివాస్నాయక్, డీసీసీబీ డైరెక్టర్ ఇంటూరి శేఖర్, తహసీల్దార్ మీనన్, ఎంపీడీవో కరుణాకర్రెడ్డి పాల్గొన్నారు.
