కామారెడ్డి టౌన్, వెలుగు : నియోజకవర్గంలో అవినీతి రహిత పాలన అందిస్తానని కామారెడ్డి ఎమ్మెల్యేగా గెలిచిన కాటిపల్లి వెంటరమణారెడ్డి పేర్కొన్నారు. ఆదివారం ఆయన మాట్లాడుతూ.. ఇక్కడి ప్రజలకు జీవితాంతం రుణపడి ఉంటానన్నారు. కేసీఆర్, రేవంత్రెడ్డి ఇక్కడికి వచ్చి పోటీచేసినా ప్రజలు తనపై పూర్తి భరోసాతో
బ్రహ్మాండమైన విజయం అందించారన్నారు. తాను ఎన్నికల్లో మందు, పైసలు పంచలేదని, నిజాయతీగా ఉన్నందుకే ప్రజలు గెలిపించారని చెప్పారు.
కామారెడ్డిలో బీజేపీ విజయం సాధించడం పట్ల ఆ పార్టీ శ్రేణులు సంబురాలు చేసుకున్నాయి. ఫలితాలు వెలువడిన వెంటనే నియోజకవర్గంలోని ఆయా గ్రామాలు, టౌన్ లనుంచి పార్టీ లీడర్లు, కార్యకర్తలు, ప్రజలు పెద్ద సంఖ్యలో రమణారెడ్డి ఇంటికి తరలివచ్చారు. డ్యాన్స్లు చేస్తూ కాలనీలో ర్యాలీ తీశారు. రమణారెడ్డిని కలిసి అభినందనలు తెలిపారు.
