యాదాద్రి/నార్కట్పల్లి/చండూరు, వెలుగు: తెలంగాణను ముక్కలుగా చేసి అల్లుడికో జిల్లా, కొడుకుకో జిల్లా ఇచ్చి కేసీఆర్ ఆగం చేసి అప్పుల పాలు చేసిండని భువనగిరి పార్లమెంట్ ఇన్చార్జి, మునుగోడు ఎమ్మెల్యే కోమటిరెడ్డి రాజగోపాల్ రెడ్డి ఆరోపించారు. జైల్లో ఉన్న బిడ్డపై ప్రేమ లేనోడికి ప్రజలంటే ప్రేమ ఉంటుందా? అని ప్రశ్నించారు. మంగళవారం ఉమ్మడి నల్గొండ జిల్లాలోని చిట్యాల, వలిగొండలో ఎమ్మెల్యేలు వేముల వీరేశం, కుంభం అనిల్కుమార్ రెడ్డి, శాసనమండలి డిప్యూటీ మాజీ చైర్మన్ నేతి విద్యాసాగర్ తో కలిసి ప్రచారం నిర్వహించారు.
ఈ సందర్భంగా రాజగోపాల్ రెడ్డి మాట్లాడుతూ లిక్కర్ స్కామ్లో అరెస్ట్ అయి కూతురు కవిత జైల్లో ఉంటే ఓట్లు అడగడానికి కేసీఆర్కు మనసెలా వచ్చిందని ప్రశ్నించారు. బిడ్డ అంటే ప్రేమ లేని ఈ కేసీఆర్కు ప్రజల మీద ప్రేముంటుందా? అని అనుమానం వ్యక్తం చేశారు. కవిత ఒక్కతే కాదని, కేసీఆర్ కుటుంబం త్వరలో జైలుకు పోతుందని చెప్పారు. బీఆర్ఎస్ లెక్క కొడుకు, కూతురు, అల్లుడి కోసం కాకుండా ప్రజల కోసమే కాంగ్రెస్ పని చేస్తుందని తెలిపారు.
కమీషన్ల కోసం రూ. లక్ష కోట్లు పెట్టి కాళేశ్వరం కడితే కూలిపోయిందని తెలిపారు. ఈ పదేండ్లు పొట్టి మంత్రి (జగదీశ్రెడ్డిని ఉద్దేశించి) ఏం చేసిండని ప్రశ్నించారు. పార్లమెంట్ ఎన్నికల్లో చామల కిరణ్కుమార్రెడ్డిని ఎంపీగా గెలిపించాలని పిలుపునిచ్చారు. దుబ్బాక నరసింహారెడ్డి, గుత్తా జితేందర్ రెడ్డి, గుత్తా అమిత్ రెడ్డి పాల్గొన్నారు.
