భద్రాద్రికొత్తగూడెం, వెలుగు : స్టూడెంట్స్లో సృజనాత్మక శక్తిని బాలోత్సవ్ వెలికి తీస్తుందని ఎమ్మెల్యే కూనంనేని సాంబశివరావు అన్నారు. అభ్యుదయ కళా సేవా సమితి ఆధ్వర్యంలో కొత్తగూడెంలోని సింగరేణి సీఈఆర్ క్లబ్లో నిర్వహిస్తున్న రాష్ట్రస్థాయి బాలోత్సవ్ పోటీలను ఎమ్మెల్యే సోమవారం ప్రారంభించారు. ఈ సందర్భంగా ఆయన మాట్లాడుతూ గత కొన్నేండ్లుగా అభ్యుదయ కళా సేవా సమితి ఆధ్వర్యంలో ఆచార్య మద్దెల శివకుమార్ బాలోత్సవ్ పేర రాష్ట్ర స్థాయి పోటీలను నిర్వహిస్తుండడం అభినందనీయమన్నారు.
బాలోత్సవ్ పేర విజ్ఞాన, సాంస్కృతిక రంగాల్లో పోటీలు పెట్టడం మంచి పరిణామమన్నారు. ప్రోగ్రాంలో జడ్పీ చైర్మన్ కంచర్ల చంద్రశేఖర్, సీపీఐ జిల్లా కార్యదర్శి సాబీర్ పాషా, కళా సేవా సమితికి చెందిన అందెల ఆనందరావు, అల్లి శంకర్, రాందాస్, ధన్రాజ్, మునీల, నీరజరెడ్డి పాల్గొన్నారు.
