పర్వతగిరి, వెలుగు: గ్రామాల్లో సంక్షేమ పథకాల కోసం దరఖాస్తు ప్రక్రియ నిరంతరం కొనసాగుతుందని వర్ధన్నపేట ఎమ్మెల్యే కేఆర్ నాగరాజు అన్నారు. వరంగల్ జిల్లా పర్వతగిరి మండలం దౌలత్ నగర్, చౌటపల్లిలో గురువారం జరిగిన ప్రజాపాలన గ్రామసభలో ఆయన పాల్గొని మాట్లాడారు. చౌటపల్లిలో జరిగిన గ్రామసభలో రూ.18 లక్షల విలువైన 60 సీఎంఆర్ఎఫ్ చెక్కులను లబ్ధిదారులకు అందజేశారు. లిస్టులో పేరులేని వారు తిరిగి దరఖాస్తు చేసుకోవాలన్నారు.
ఇందిరమ్మ ఇల్లు ఇప్పిస్తానని ఎవరైనా డబ్బులు అడిగితే టోల్ ఫ్రీ నెంబర్ 8096107107 కి కాల్ చేసి చెప్పాలన్నారు. కార్యక్రమంలో మండల స్పెషల్ ఆఫీసర్, డీపీవో కల్పన, తహసీల్దార్ వెంకటస్వామి, ఎంపీడీవో శంకర్ నాయక్,మామునూర్ ఏసీపీ తిరుపతి, మండల పార్టీ అధ్యక్షుడు శ్రీనివాస్ నాయక్, జిల్లా ఉపాధ్యక్షుడు అనిల్ రావు, సెక్రటరీలు విక్రమ్, రఘు తదితరులు పాల్గొన్నారు.
