యాదాద్రి, వెలుగు : బస్వాపురం (నృసింహ సాగర్) రిజర్వాయర్ కారణంగా ముంపునకు గురవుతున్న బీఎన్ తిమ్మాపూర్‌‌కు రూ. 262.48 కోట్లు అవసరమని ఆఫీసర్లు నివేదించారు. గురువారం కలెక్టరేట్లో భువనగిరి నియోజకవర్గంలోని రిజర్వాయర్, కాలువ పెండింగ్ పనులపై ఆఫీసర్లతో ఎమ్మెల్యే కుంభం అనిల్కుమార్ రెడ్డి, అడిషనల్ కలెక్టర్ ఏ భాస్కర్రావు రివ్యూ నిర్వహించారు.
భూ సేకరణతో పాటు పెండింగ్లో ఉన్న పనులను పూర్తి చేయడానికి అవసరమైన నిధుల కోసం ప్రతిపాదనలు రూపొందించాలని ఆయన సూచించారు. ఈ సందర్భంగా బస్వాపురం రిజర్వాయర్ ముంపు గ్రామమైన బీఎన్ తిమ్మాపూర్లోని గ్రామ కంఠం భూసేకరణ చేయాల్సి ఉందని ఆఫీసర్లు తెలిపారు. ఇందుకోసం రూ. 110 కోట్లు, వ్యవసాయ భూములకు సంబంధించి రూ. 102.48 కోట్లు, నిర్వాసితులకు కోసం హుస్సేనాబాద్లోని ఆర్ అండ్ ఆర్ కాలనీ కోసం రూ. 50 కోట్లు అవసరమని వివరించారు.
అదే విధంగా బస్వాపురం రిజర్వాయర్, ప్యాకేజీ 16 కాలువ, భునాదిగాని కాలువ, పిలాయిపల్లి, ధర్మారెడ్డి, భీమలింగం కాలువల కోసం భూ సేకరణతో పాటు పెండింగ్ పనులను వివరించారు. మీటింగ్లో స్పెషల్ డిప్యూటీ కలెక్టర్ నాగలక్ష్మి, ఎస్ఈ శ్రీనివాస్, ఆర్డీవోలు జగన్నాథరావు, అమరేందర్, ఇరిగేషన్ ఆఫీసర్లు ఉన్నారు.
