పాలకుర్తి, వెలుగు : నియోజకవర్గంలోని దళితవాడలపై ప్రత్యేక శ్రద్ధ పెట్టి అభివృద్ధి చేస్తామని ఎమ్మెల్యే మామిడాల యశస్వినిరెడ్డి అన్నారు. బుధవారం జనగామ జిల్లా పాలకుర్తి మండలం వల్మిడి ఎస్సీ కాలనీలో ఆమె పర్యటించారు. ఈ సందర్భంగా కాలనీలో దళితులు ఎదుర్కొంటున్న సమస్యల్ని అడిగి తెలుసుకున్నారు. సైడ్ డ్రైనేజీలు పరిశీలించి, శానిటేషన్ పై చొరవ తీసుకోవాలని ఆఫీసర్లను ఆదేశించారు. అర్హులైన నిరుపేదలందరికీ సంక్రాంతి తర్వాత ఇందిరమ్మ ఇల్లు ఇస్తామన్నారు.
ఆమెవెంట కాంగ్రెస్ నియోజకవర్గ ఇన్చార్జి అనుమాండ్ల ఝాన్సీరెడ్డి, బ్లాక్ కాంగ్రెస్ అధ్యక్షుడు రాపాక సత్య నారాయణ, మండలాధ్యక్షుడు గిరగాని కుమారస్వామి గౌడ్ తదితరులున్నారు. అనంతరం గ్రామంలోని ఆలయంలో జనగామ కలెక్టర్ రిజ్వాన్ బాషా షేక్తో కలిసి సమీక్ష నిర్వహించారు. ఆలయంలో పెండింగ్ పనులు, అభివృద్ధికి కావాల్సిన నిధుల అంచనాలను తెలసుకున్నారు. అడిషనల్ కలెక్టర్ రోహిత్ సింగ్, వివిధ శాఖల అధికారులు పాల్గొన్నారు.
