హుజురాబాద్, వెలుగు : ముఖ్యమంత్రి కేసీఆర్, కేటీఆర్, హరీష్ రావుల కంటే తానే ఎక్కువ చదువుకున్నానని మానకొండూరు ఎమ్మెల్యే రసమయి బాలకిషన్ అన్నారు. మంగళవారం కరీంనగర్ జిల్లా శంకరపట్నం మండలంలోని పలు గ్రామాల్లో అంబేద్కర్ విగ్రహాలకు పూలమాలలు వేసి నివాళుర్పించారు. కన్నాపూర్ లో అంబేద్కర్ విగ్రహాన్ని ఆవిష్కరించారు. ఈ సందర్భంగా బాలకిషన్ మాట్లాడుతూ అంబేద్కర్ స్ఫూర్తితోనే తాను డాక్టరేట్ సాధించానన్నారు.
‘ఎమ్మెల్యే రసమయి అంటే ఎగురుకుంటూ పాటలు పాడుకుంటూ వస్తాడనుకుంటున్నారు. కానీ నేను పేద దళిత కుటుంబంలో పుట్టినా ఎంఏ బీఎడ్, ఎంఫిల్, పీహెచ్డీలో గోల్డ్ మెడల్ సాధించిన’ అని అన్నారు. 20 ఏండ్లు టీచర్గా పని చేశానన్నారు. అంతకు ముందు గద్దపాకలో రేషన్ షాప్ ప్రారంభోత్సవానికి వెళ్లిన రసమయిని కాంగ్రెస్, బీజేపీ లీడర్లు అడ్డుకునే ప్రయత్నం చేశారు. దీంతో పోలీసులు వారిని అడ్డుకొని పక్కకు తప్పించారు. ఈ సందర్భంగా తోపులాట జరిగి ఉద్రిక్త వాతావరణం ఏర్పడింది. గ్రామ సమస్యలపై ప్రశ్నిస్తే అడ్డుకుంటారా..? అంటూ ఎమ్మెల్యేకు వ్యతిరేకంగా నినాదాలు చేశారు. జడ్పీటీసీ శ్రీనివాస్ రెడ్డి, ఎంపీపీ సరోజన, వైస్ ఎంపీపీ రమేశ్ పాల్గొన్నారు.
