నారాయణ్ ఖేడ్, వెలుగు: మండల పరిధిలోని సంజీరావుపేట, నిజాంపేట్ మండల పరిధిలోని నాగ్ ధర్, బాచెపల్లి గ్రామాల్లో ఎమ్మెల్యే సంజీవరెడ్డి శనివారం కొనుగోలు కేంద్రాలను ప్రారంభించారు. ఈ సందర్భంగా ఆయన మాట్లాడుతూ కాంగ్రెస్ ప్రభుత్వం రైతులకు అండగా ఉంటుందని, రైతులు పండించిన ప్రతి గింజను కొనుగోలు చేస్తామన్నారు. సన్నాలకు రూ.500 బోనస్ చెల్లిస్తున్నామని, సబ్సిడీపై వ్యవసాయ పనిముట్లు అందజేస్తున్నామని ఈ అవకాశాన్ని రైతులు సద్వినియోగం చేసుకోవాలని సూచించారు.
అనంతరం కొండాపూర్, మంగళపేట్ లోని ఆంజనేయ స్వామి ఆలయంలో నిర్వహించిన వేడుకల్లో పాల్గొని ప్రత్యేక పూజలు చేశారు. భవానీ టెంపుల్ వద్ద నుంచి శివాజీ చౌక్ వరకు వీహెచ్పీ, బజరంగ్దళ్ ఆధ్వర్యంలో భారీ ర్యాలీ నిర్వహించారు. ఆయా కార్యక్రమాల్లో డీసీసీ ప్రధాన కార్యదర్శి శేఖర్ రెడ్డి, కాంగ్రెస్ నాయకులు రమేశ్ చౌహన్, శంకర్, వివేకానంద, మాజీ ఎంపీ బీబీ పాటిల్, జీఎంఆర్ ఫౌండేషన్ అధ్యక్షుడు మచ్చేందర్ పాల్గొన్నారు.
