ఆదిలాబాద్/కోల్బెల్ట్/భైంసా, వెలుగు: తెలంగాణ మలిదశ ఉద్యమ తొలి అమరవీరుడు శ్రీకాంతాచారి 15వ వర్ధంతిని ఉమ్మడి జిల్లా వ్యాప్తంగా నిర్వహించారు. కోటపల్లి మండలం రొయ్యలపల్లిలో చెన్నూరు ఎమ్మెల్యే వివేక్ వెంకటస్వామి శ్రీకాంతాచారీ ఫొటోకు పూలమాల వేసి నివాళ్లర్పించారు. అనంతరం మాట్లాడుతూ.. శ్రీకాంతాచారి మలిదశ తెలంగాణ ఉద్యమానికి ఊపిరి పోసిన వీరుడన్నారు. ఆయన త్యాగం వృథా కాలేదని, నాలుగు కోట్ల ప్రజల ఆకాంక్ష ఫలించిందన్నారు. కాంగ్రెస్ లీడర్లు పాల్గొన్నారు.
ఆదిలాబాద్ జిల్లా కేంద్రంలో శ్రీకాంతాచారి విగ్రహానికి పూలమాల వేసి ఎమ్మెల్యే పాయల్ శంకర్ నివాళులు అర్పించారు. రాష్ట్ర సాధన కోసం ప్రాణత్యాగం చేసిన శ్రీకాంతాచారి వర్ధంతిని రాష్ట్రవ్యాప్తంగా జరుపుకునేలా ప్రభుత్వం ఆదేశాలివ్వాలన్నారు. భైంసాలో వివిధ పార్టీలు, సంఘాల ఆధ్వర్యంలో బస్టాండ్ సమీపంలోని శ్రీకాంతాచారి చౌరస్తాలో ఆయన ఫొటోకు పూలమాలలు వేసి నివాళులు అర్పించారు.
