- రాష్ట్ర బడ్జెట్లోనూ 18 శాతం ఫండ్స్ కేటాయించాలి
హైదరాబాద్, వెలుగు: రాష్ట్రంలో ఎస్సీలకు 18 శాతం రిజర్వేషన్లు కేటాయించేలా చూడాలని కాంగ్రెస్ హైకమాండ్ను చెన్నూరు ఎమ్మెల్యే వివేక్ వెంకటస్వామి కోరారు. ‘‘రాష్ట్రంలో ఎస్సీల జనాభా 18 శాతానికి పెరిగినట్టు రాష్ట్ర ప్రభుత్వం ఇటీవల నిర్వహించిన కులగణన సర్వేలో తేలింది. దానికి అనుగుణంగా ఎస్సీల రిజర్వేషన్లను 18 శాతానికి పెంచాలి” అని విజ్ఞప్తి చేశారు. ఈ మేరకు కాంగ్రెస్ చీఫ్ మల్లికార్జున ఖర్గేకు వివేక్ గురువారం లేఖ రాశారు.
కాంగ్రెస్ ఎల్లప్పుడూ సామాజిక న్యాయం కోసం పాటుపడుతుందని, అందుకు చేవెళ్ల ఎస్సీ, ఎస్టీ డిక్లరేషనే నిదర్శనమని అందులో పేర్కొన్నారు. ‘‘బడ్జెట్లో ఎస్సీలకు 15 శాతం నిధులు కేటాయించాలని 2013లో ఆనాటి కాంగ్రెస్ సర్కార్ చట్టం చేసింది. ఆ నిధులను తప్పనిసరిగా ఖర్చు చేయాలని అందులో పేర్కొంది.
అయితే ఇప్పుడు రాష్ట్రంలో ఎస్సీల జనాభా 18 శాతానికి పెరిగినందున, వచ్చే బడ్జెట్లో ఎస్సీలకు 18 శాతం నిధులు కేటాయించేలా చూడాలి” అని విజ్ఞప్తి చేశారు. ‘‘రాష్ట్రంలోని ఎస్సీల్లో మెజార్టీ ప్రజలకు భూమి లేదు. దీంతో వాళ్లకు రైతు రుణమాఫీ, రైతు భరోసా లాంటి పథకాలతో లబ్ధి జరగడం లేదు. ఈ నేపథ్యంలో నేను చేసిన విజ్ఞప్తిని పరిగణనలోకి తీసుకోవాలి” అని కోరారు.
