పాలమూరు, వెలుగు: హాస్టళ్లు, గురుకులాల్లో ఏ సమస్య ఉన్నా తన దృష్టికి తీసుకురావాలని ఎమ్మెల్యే యెన్నం శ్రీనివాస్ రెడ్డి సూచించారు. శుక్రవారం జిల్లా కేంద్రంలోని ఓ ప్రైవేట్ ఫంక్షన్హాల్లో జరిగిన పిల్లలమర్రి బాలోత్సవం కార్యక్రమానికి చీఫ్ గెస్ట్గా హాజరయ్యారు. విద్యార్థులు ప్రదర్శించిన కల్చరల్ ప్రోగ్రామ్స్ను వీక్షించారు. అనంతరం గర్ల్స్ ఎస్సీ హాస్టల్(బి), ఎస్సీ హాస్టల్(డి), ఆనంద నిలయం, ఎస్సీ హాస్టల్(ఏ)ను విజిట్ చేశారు. హాస్టళ్లలో విద్యార్థులు ఎదుర్కొంటున్న సమస్యలు అడిగి తెలుసుకున్నారు. ఎస్సీ బాయ్స్ హాస్టల్లో స్టూడెంట్లతో కలిసి ఎమ్మెల్యే భోజనం చేశారు. ఈ సందర్భంగా ఎమ్మెల్యే మాట్లాడుతూ ఏకాగ్రతతో చదువుకొని ఉన్నత శిఖరాలకు చేరుకోవాలన్నారు.
ప్రభుత్వ ఉద్యోగాలు సాధించేందుకు ప్రిపేర్ కావాలని, తాను అండగా ఉంటానని, కావాల్సిన మెటీరియల్ ఉచితంగా అందిస్తానని హామీ ఇచ్చారు. మహబూబ్నగర్ను ఎడ్యుకేషనల్ హబ్గా అభివృద్ధి చేయాలనే లక్ష్యంతో స్కూల్స్, హాస్టల్స్, గురుకులాల్లో అన్నిరకాల సౌలతులు కల్పించేందుకు ప్రభుత్వం చర్యలు తీసుకుంటుందని చెప్పారు. పోటీ పరీక్షలకు తయారయ్యే వారి కోసం పుస్తకాలు, డిజిటల్ బోర్డు అందిస్తానని హామీ ఇచ్చారు. అంతకుముందు కాంగ్రెస్ పార్టీ ఆఫీస్లో మాజీ ప్రధాని మన్మోహన్ సింగ్ మృతికి సంతాపం తెలిపారు. ఆయన ఫొటోకు పూలమాలలు వేసి నివాళులు అర్పించారు. రెండు నిమిషాలు మౌనం పాటించారు. మున్సిపల్ చైర్మన్ ఆనంద్ గౌడ్, టీపీసీసీ ప్రధాన కార్యదర్శి ఎస్.వినోద్ కుమార్ పాల్గొన్నారు.
