- సాధ్యం కాదని కిషన్ రెడ్డి ప్రకటించడం దారుణం: కవిత
హైదరాబాద్, వెలుగు: తెలంగాణ రాష్ట్రంపై కేంద్రంలోని బీజేపీ సర్కారుకు చిత్తశుద్ధి ఉంటే.. బయ్యారంలో ఉక్కు ఫ్యాక్టరీని ఏర్పాటు చేయాలని బీఆర్ఎస్ ఎమ్మెల్సీ కల్వకుంట్ల కవిత డిమాండ్ చేశారు. స్టీల్ఫ్యాక్టరీ ఏర్పాటుకు కేంద్రంపై రాష్ట్ర ప్రభుత్వం ఒత్తిడి తేవాలన్నారు. స్టీల్ ఫ్యాక్టరీని ఏర్పాటు చేయడం సాధ్యం కాదని పార్లమెంట్లో కేంద్ర మంత్రి కిషన్ రెడ్డి ప్రకటించడం బాధాకరమని గురువారం ఆమె ఓ ప్రకటనలో పేర్కొన్నారు. రాష్ట్రం నుంచి 8 మంది బీజేపీ ఎంపీలను గెలిపిస్తే ఒక్కరు కూడా దీనిపై స్పందించకపోవడం దారుణమన్నారు.
మంత్రి పొంగులేటి శ్రీనివాస్రెడ్డి గతంలో ఎంపీగా ఉన్న సమయంలో ఉక్కు పరిశ్రమ కోసం డిమాండ్ చేశారని.. కానీ, ఇప్పుడు మాత్రం మాట్లాడడం లేదని విమర్శించారు. బయ్యారం స్టీల్ ప్లాంట్ ఏర్పాటు చేయాలని రాష్ట్ర విభజన చట్టంలోనే ఉందని, కేంద్రంలో ఏ పార్టీ అధికారంలో ఉన్నా చట్టాన్ని అమలు చేయాల్సిందేనని ఆమె డిమాండ్ చేశారు. బయ్యారం ఉక్కు.. తెలంగాణ హక్కు అంటూ 2013లోనే అప్పటి ప్రధాని మన్మోహన్ సింగ్కు కేసీఆర్ లేఖ రాశారన్నారు. అక్కడ పరిశ్రమను ఏర్పాటు చేస్తే స్థానిక యువతకు ఉపాధి అవకాశాలు పెరుగుతాయన్నది కేసీఆర్ ఆలోచన అని చెప్పారు.
కాగా, కవితను సగర, వంశరాజుల సంఘాల నాయకులు గురువారం ఆమె నివాసంలో కలిశారు. తమకు ప్రభుత్వం ఆరోగ్య రక్షణ కల్పించేలా అసెంబ్లీలో పోరాడాలని సగర సంఘం అధ్యక్షుడు విజయేందర్ సాగర్ కోరారు. బీసీ డీలో ఉన్న తమను బీసీ ఏలోకి మార్చేలా ప్రభుత్వంపై ఒత్తిడి తేవాలన్నారు. సంచార జాతులుగా ఉన్న వంశరాజులు ఆర్థిక, రాజకీయ, విద్య, సామాజిక రంగాల్లో వెనుకబడ్డారని, దీనిపై అసెంబ్లీలో ప్రశ్నించాలని కవితను ఆ సంఘం అధ్యక్షుడు మురళి కోరారు. అలాగే, తెలంగాణ తల్లి విగ్రహం మార్పుపై ఈ నెల 14న సోమాజిగూడ ప్రెస్ క్లబ్లో జాగృతి ఆధ్వర్యంలో రౌండ్ టేబుల్ సమావేశాన్ని నిర్వహించనున్నట్టు తెలిపారు.
