ఇండ్లు కడ్దామంటే భూమి దొరకలె : కవిత 

• కేసీఆర్​వి మానవీయ పథకాలు.. 

నిజామాబాద్, వెలుగు: పేద కుటుంబాలకు సరిపడా డబుల్​ బెడ్​రూమ్ ఇండ్లు కట్టలేకపోయామని, అది తమ తప్పేనని ఎమ్మెల్సీ కవిత అన్నారు. ‘‘భూమి దొరక్క ఇండ్ల నిర్మాణం చేపట్టలేకపోయాం. ఈ బాధ మాలో కూడా ఉన్నది. ఈసారి ప్రభుత్వం ఏర్పడగానే ఇండ్ల నిర్మాణానికి ఎక్కువ ప్రాధాన్యం ఇస్తాం. ప్రైవేట్​ ల్యాండ్​ కొనైనా సరే ప్రజల డిమాండ్ ​మేరకు ఇండ్లు నిర్మించి ఇస్తాం” అని చెప్పారు.

శుక్రవారం నిజామాబాద్​ అర్బన్​ నియోజకవర్గంలో నిర్వహించిన రోడ్​షోలో కవిత మాట్లాడారు. ఇప్పటి వరకు ఏ ప్రభుత్వం ఇవ్వనన్ని జాబ్స్​ యూత్​కు ఇచ్చామని, మరిన్ని ఉద్యోగాలు ఇచ్చేందుకు కృషి చేస్తామని చెప్పారు. ‘‘కొత్త రేషన్​ కార్డుల కోసం దరఖాస్తు చేసుకుని నిరీక్షిస్తున్న వాళ్లందరికీ ఎలక్షన్లు కాంగానే కొత్త కార్డులిస్తాం. సన్నబియ్యం పంపిణీ షురూ చేస్తాం. కేసీఆర్ సర్కార్ లా​ అండ్​ ఆర్డర్​కు అధిక ప్రాధాన్యం ఇస్తున్నది. గడిచిన పదేండ్లలో ఎక్కడా మత ఘర్షణలు జరగలేదు. నిజామామాద్​ జిల్లాలో ఒక్కటే మైనారిటీ రెసిడెన్షియల్​ స్కూల్ ఉంటే, మేం 22కు పెంచాం” అని తెలిపారు.    

కేసీఆర్​వి మానవీయ పథకాలు.. 

పేద కుటుంబాలకు మేలు చేసే పథకాలను సీఎం కేసీఆర్​ అమలు చేస్తున్నారని కవిత అన్నారు. 60 ఏండ్లు పాలించిన కాంగ్రెస్.. షాదీ ముబారక్​ లాంటి స్కీమ్​లను ఎందుకు అమలు చేయలేదని ప్రశ్నించారు. ఎస్సీ, ఎస్టీ, బీసీ, మైనారిటీ స్టూడెంట్స్​కు ఉన్నత విద్య అవకాశాలు పెంచడంతో ఐఐటీ, ఐఐఎం లాంటి విద్యాసంస్థలతో పాటు సివిల్​సర్వీసెస్ కు ఎంపిక అవుతున్నారని చెప్పారు. ‘‘రెండు దఫాలు కేసీఆర్​కు అధికారమిచ్చిన ప్రజలకు క్రమపద్ధతిలో చేయగలిగినంత చేశాం. ఇంకా చేయాల్సిన పనులు చాలా ఉన్నాయి” అని అన్నారు. రోడ్ షోలో నిజామాబాద్ అర్బన్​అభ్యర్థి గణేశ్​గుప్తా తదితరులు పాల్గొన్నారు.