ఉమ్మడి ఖమ్మం జిల్లాలో ప్రశాంతంగా జరిగిన ఎమ్మెల్సీ పోలింగ్

• ఖమ్మం జిల్లాలో 67.63  శాతం,కొత్తగూడెం జిల్లాలో 70.01 శాతం పోలింగ్​ నమోదు

ఖమ్మం/ భద్రాద్రికొత్తగూడెం, వెలుగు : వరంగల్, ఖమ్మం, నల్గొండ గ్రాడ్యుయేట్​ ఎమ్మెల్సీ ఉప ఎన్నికల పోలింగ్ ఉమ్మడి ఖమ్మం జిల్లా పరిధిలో ప్రశాంతంగా జరిగింది. ఒకటిరెండు చోట్ల తప్ప ఎక్కడా ఎలాంటి అవాంఛనీయ సంఘటనలు జరగలేదు. సాయంత్రం 4 గంటల వరకు ఖమ్మం జిల్లాలో 67.63 శాతం పోలింగ్ నమోదు కాగా, భద్రాద్రి కొత్తగూడెం జిల్లాలో 70.01శాతం ఓటింగ్ నమోదైంది.

ఉదయం 8 గంటలకు పోలింగ్ ప్రారంభమైంది. పొద్దటి నుంచే గ్రాడ్యుయేట్లు ఓటేసేందుకు పోలింగ్​ కేంద్రాలకు క్యూ కట్టారు. మహిళలు, ఉద్యోగులు, నిరుద్యోగులు, రిటైర్డ్ ఉద్యోగులు, పలువురు దివ్యాంగులు ఉత్సాహంగా ఓటింగ్ లో పాల్గొన్నారు. ఖమ్మం జిల్లా కలెక్టర్​ వీపీ గౌతమ్ దంపతులు​ ఖమ్మం మహిళా ప్రభుత్వ కాలేజీలో ఓటు హక్కు వినియోగించుకున్నారు. సాయంత్రం 4 గంటల వరకు పోలింగ్ కేంద్రాల దగ్గర క్యూలైన్లలో ఉన్న వారిని ఓటేసేందుకు అనుమతించారు. పోలింగ్ సమయం ముగిసిన తర్వాత బ్యాలెట్ బాక్స్​ లను ప్రత్యేక వాహనాల్లో, పోలింగ్ భద్రత, బందోబస్తు మధ్య స్ట్రాంగ్ రూమ్​లకు తరలించారు. 

భద్రాద్రి కొత్తగూడెం జిల్లాలో మందకొండిగా మొదలైన పోలింగ్​ మధ్యాహ్నం వరకు ఊపందుకుంది. జిల్లాలో గ్రాడ్యుయేట్ ఎమ్మెల్సీ ఓటర్లు 40,106 మంది ఉండగా 28,077 మంది తమ ఓటు హక్కును వినియోగించుకున్నారు. ఉదయం 10 గంటలవరకు కేవలం 7.7శాతం మాత్రమే పోలింగ్​ నమోదైంది. 12 గంటల వరకు 25.79శాతం,2 గంటలవరకు 46.60శాతం పోలింగ్​ నమోదు కాగా.. ముగిసే సమయానికి 70.01శాతం పోలింగ్​ జరిగినట్టు అధికారులు తెలిపారు. 

ఓటేసిన ప్రముఖులు

ఎమ్మెల్సీ ఎన్నికల్లో ఎమ్మెల్యేలు, అధికారులు తమ ఓటు హక్కు వినియోగించుకున్నారు. ఎమ్మెల్సీ, బీఆర్ఎస్ ఖమ్మం జిల్లా అధ్యక్షుడు తాతా మధుసూదన్​ ఖమ్మం లోని ఎస్​ఆర్​ అండ్​ బీజీఎన్​ఆర్​ కాలేజీలో, మాజీ మంత్రి పువ్వాడ అజయ్ ఖమ్మం ఇందిరానగర్​ స్కూల్​ లో, సత్తుపల్లి ఎమ్మెల్యే మట్టా రాగమయి దయానంద్​ దంపతులు సత్తుపల్లిలోని పోలింగ్ కేంద్రంలో ఓటు వేశారు. బీఆర్ఎస్​ ఎంపీ వద్దిరాజు రవిచంద్ర భద్రాద్రి కొత్తగూడెం జిల్లా ఇల్లందులో ఓటింగ్ సరళిని 
పరిశీలించారు. 

బీజేపీ నేత కారును అడ్డుకున్న కాంగ్రెస్​

ఖమ్మం జిల్లా ముదిగొండలో డబ్బులు తరలిస్తున్నారంటూ బీజేపీ నేత దేవకి వాసుదేవరావు వాహనాన్ని కాంగ్రెస్​ నేతలు అడ్డుకున్నారు. ఈ సందర్భంగా బీజేపీ, కాంగ్రెస్​ కార్యకర్తల మధ్య స్వల్ప వాగ్వాదం జరిగింది. పోలీసుల జోక్యం చేసుకొని ఇరువర్గాలకు సర్దిచెప్పారు. 

• ఖమ్మం, కొత్తగూడెం, పాల్వంచ, వైరా, మధిర, పాలేరులో పలు చోట్ల ఓటర్లకు డబ్బులు పంచుతున్నారని ఫిర్యాదులు వచ్చాయి. పోల్​ స్లిప్​ లు చూపించిన వారికి, రూ.500 చొప్పున పంపిణీ చేశారు. 
• పలు చోట్ల పార్టీ ముఖ్య నేతల నుంచి వచ్చిన డబ్బులను తమకు పంపిణీ చేయకుండా లీడర్లే జేబులో వేసుకున్నారంటూ ఓటర్లు ఆరోపించారు. 
• ఖమ్మం జిల్లా వైరాలోని 394 పోలింగ్ బూత్​ లో తన ఓటును వేరెవరో వేశారంటూ సంపశాల మోహన్​ కాంత్ అనే గ్రాడ్యుయేట్ ఎన్నికల అధికారికి ఫిర్యాదు చేశారు. 
• కూసుమంచిలో కన్నెబోయిన నరేశ్​​ అనే ఓటరు తన ఓటు హక్కు వినియోగించు కోలేకపోయాడు. సాయంత్రం 4 గంటలకే క్యూలైన్లో నిల్చున్నా, చివరకు ఓటు వేసే సమయానికి అదే పోలింగ్ కేంద్రంలోని మరో బూత్​ లో ఓటు ఉండడంతో ప్రిసైడింగ్ ఆఫీసర్​ ఓటేసేందుకు అనుమతించలేదు.