- ఏపీకి చెందిన 26 బీసీ కులాలను తెలంగాణ బీసీ జాబితాలో చేర్చొద్దు
- ఈ నిర్ణయాన్ని బీసీ కమిషన్ పునసమీక్షించాలి
బషీర్బాగ్, వెలుగు: ఏపీకి చెందిన 26 బీసీ కులాలను తెలంగాణలో బీసీ జాబితాలో చేర్చే నిర్ణయాన్ని బీసీ కమిషన్ పున సమీక్షించాలని ఎమ్మెల్సీ తీన్మార్ మల్లన్న కోరారు. బషీర్ బాగ్ ప్రెస్ క్లబ్ లో బీసీ ఏ కులాల హక్కుల పరిరక్షణ సమితి అధ్యక్షుడు ఎమ్మెస్ నరహరి ఆధ్వర్యంలో జరిగిన సమావేశానికి ఆయన ముఖ్య అతిథిగా హాజరై మాట్లాడారు. ఎన్నో ఏళ్లుగా వెనుకబడిన బీసీ కులాలు ఇప్పుడిప్పుడే తేరుకుంటున్నాయన్నారు.
ఈ సమయంలో ఆంధ్ర బీసీ కులాలను తీసుకొచ్చి తెలంగాణ బీసీ కులాలలో కలపడం ఎంతవరకు సమంజసమని ప్రశ్నించారు. ఏపీకి చెందిన కొంతమంది పనిగట్టుకొని రాష్ట్ర బీసీ ఏ కులాలలోకి ప్రయత్నించడం బాధాకరమన్నారు. హైకోర్టు తీర్పును ప్రభుత్వం ఉల్లంఘించడం మంచిది కాదన్నారు. బీసీ కులాల మధ్య పంచాయతీ పెడితే ఊరుకునే ప్రసక్తే లేదని హెచ్చరించారు. బీసీ నేతలు డా. భాగయ్య, కె.రామచందర్, ప్రొ. సాంబయ్య, ప్రొ. సాంబమూర్తి, పరమేశ్వరి తదితరులు పాల్గొన్నారు.
