అమ్మతనం.. ప్రతి తల్లి ఆనందించే విషయం. కడుపులో బిడ్డ పడ్డప్పటి నుంచి ఎంతో జాగ్రత్తగా కాచుకుంటారు బిడ్డని. ఆ క్షణం నుంచి 9 నెలలు నిండేదాకా బరువును మోస్తుంది. కానీ, ఆస్ట్రేలియాకు చెందిన ఒక మోడల్ మాత్రం, బిడ్డ పుట్టే వరకు తను ప్రెగ్నెంట్ అన్న విషయం తెలియదంటోంది. గర్భిణులకు ఉండేలా పొట్ట ఉబ్బెత్తుగా కూడా లేదంటోంది. అవును! ప్రెగ్నెంట్ అయితే తెలియకుండా ఉంటుందా? అన్న డౌట్ రావొచ్చు. కానీ, ఇటీవల ఆస్ట్రేలియా మేగజీన్కు ఇచ్చిన ఇంటర్వ్యూలో ఆమె ఆ విషయం చెప్పింది. ఆ మోడల్ పేరు ఎరిన్ లాంగ్మెయిడ్. కడుపు పెద్దగా లేకపోవడం, ఆ లక్షణాలూ తనలో కనిపించకపోవడంతో ప్రెగ్నెంట్ అన్న విషయం తెలియలేదని చెబుతోంది. బాత్రూంలో బిడ్డను కనే 10 నిమిషాల ముందు వరకూ మామూలు మనిషిలాగే ఉన్నానని చెప్పింది. గర్భం రాకుండా కాంట్రసెప్టివ్ పిల్స్ వాడానని, కానీ, అవేవీ పనిచేయలేదని తెలిపింది. ఇటీవలే తన పాప, భర్త డాన్ కార్టీతో కలిసి దిగిన ఫొటోను ఇన్స్టాగ్రామ్లో షేర్ చేసింది లాంగ్మెయిడ్. పాపకు ఐలా అని పేరుపెట్టారు. 3.6 కిలోల బరువుతో ఆరోగ్యంగా పుట్టింది ఐలా.
2500 మందిలో ఒకరికి
ఇలాంటి ప్రెగ్నెన్సీ ప్రతి 2500 మందిలో ఒకరికి వస్తుందని నిపుణులు చెబుతున్నారు. దాన్నే స్టెల్త్ లేదా క్రిప్టిక్ ప్రెగ్నెన్సీ అని చెబుతున్నారు. ఇలాంటి సందర్భంలో కడుపుతో ఉన్నామన్న విషయం ఆ మహిళలకు తెలియదంటున్నారు. ప్రతి 475 మందిలో ఒకరికి, 20 వారాలు వచ్చాక ప్రెగ్నెంట్ అన్న విషయం తెలుస్తుందని చెబుతున్నారు.
మరికొందరు నిపుణులు మాత్రం దానిని డినైడ్ ప్రెగ్నెన్సీస్ అనీ చెబుతున్నారు. అంటే సైకలాజికల్ కారణాలతో తాము ప్రెగ్నెంట్ అన్న విషయాన్ని గుర్తించకపోవడమే డినైడ్ ప్రెగ్నెన్సీ అని అంటున్నారు. అయితే, క్రిప్టిక్ ప్రెగ్నెన్సీ అనేది ఇటీవలి కాలంలోనే ఎక్కువగా జరుగుతోందని చెబుతున్నారు. శరీర తత్వాలకు తగ్గట్టు కొందరికి కడుపు పైకి కనిపించదని, లోపలా మార్పులు జరుగుతున్నట్టు అనిపించదని చెబుతున్నారు. అయితే, ఎవరికి, ఎప్పుడు ఇలా జరుగుతుందన్నది మాత్రం నిపుణులు చెప్పలేకపోతున్నారు. క్రిప్టిక్ ప్రెగ్నెన్సీకి గల బయోలాజికల్ కారణాలను అంచనా వేయడం కష్టమంటున్నారు. ప్లేసెంటా (మాయ) ఉండే పొజిషన్ వల్ల బిడ్డ కదలికలు తల్లికి తెలుస్తాయని, దాని పొజిషన్లో తేడాల వల్ల కూడా ప్రెగ్నెంట్ అన్న విషయం కొందరికి తెలియదని, కదలికలూ గుర్తించలేరని ఫ్లోరిడాకు చెందిన గైనకాలజిస్ట్ క్రిస్టిన్ గ్రీవ్స్ చెప్పారు.
