గండీడ్, వెలుగు: మహబూబ్నగర్ జిల్లా మహ్మదాబాద్ ఎస్సై సురేశ్ ఆదివారం లంచం తీసుకుంటూ ఏసీబీ అధికారులకు పట్టుబడ్డాడు. ఏసీబీ డీఎస్సీ కృష్ణగౌడ్ తెలిపిన వివరాల ప్రకారం.. గండీడ్ మండలం పగిడియాలకు శ్రీనివాస్ రెడ్డి అదే గ్రామానికి చెందిన ఓ అమ్మాయి ప్రేమించుకున్నారు. చివరికి పెళ్లికి ఒప్పుకోకపోవడంతో, బాధితులు శ్రీనివాస్ రెడ్డిపై కేసు పెట్టారు.
అతడిని రిమాండ్ కు పంపించగా, బెయిల్పై విడుదలయ్యాడు. రిమాండ్కు ముందు రూ.50 వేలు ఇవ్వాలని ఎస్సై సురేశ్.. శ్రీనివాస్రెడ్డిని డిమాండ్ చేశాడు. మధ్యవర్తుల ద్వారా రూ.30 వేలు ముందే తీసుకున్నాడు. మిగిలిన రూ.20 వేలు ఇవ్వాలని అడగడంతో బాధితుడు ఏసీబీ ఆశ్రయించాడు. ఆదివారం సాయంత్రం మిగిలిన రూ.20 వేలు ఇవ్వడానికి బాధితుడు పోలీస్ స్టేషన్కు వెళ్లగా, రైటర్ ఇస్మాయిల్కు ఇవ్వాలని ఎస్సై చెప్పాడు.
ఆయన తీసుకోకుండా పక్కనే ఉన్న జిరాక్స్ సెంటర్ ఓనర్ మూసాకు ఇవ్వాలని చెప్పాడు. ఏసీబీ అధికారులు మూసా దగ్గర ఉన్న రూ.20 వేలు స్వాధీనం చేసుకొని ఎస్సై సురేశ్, రైటర్ ఇస్మాయిల్, జిరాక్స్ సెంటర్ ఓనర్ మూసాపై కేసు నమోదు చేశామని ఏసీబీ డీఎస్పీ తెలిపారు.
