- గ్రేటర్పరిధిలో అందుబాటులోకి తెచ్చిన వాటర్బోర్డు
- జీహెచ్ఎంసీ, పోలీస్సిబ్బందితో కలిసి పనిచేసేలా ప్లాన్
- మురుగు నీటి నిర్వహణ, వాన నీటి తొలగింపునకు చర్యలు
హైదరాబాద్, వెలుగు: మురుగు నీటి నిర్వహణ, వాన నీటి తొలగింపు, భారీ వర్షాల టైంలో ప్రమాదాల నివారణకు వాటర్బోర్డు చర్యలు తీసుకుంటోంది. ముఖ్యంగా మురుగు నీరు రోడ్లపై ఓవర్ఫ్లో కాకుండా, మ్యాన్హోళ్లు పొంగకుండా చూసేందుకు నాలుగు స్పెషల్టీమ్స్ ను అందుబాటులోకి తెచ్చింది. మాన్సూన్యాక్షన్ప్లాన్లో భాగంగా సెంట్రల్ సేఫ్టీ ప్రొటోకాల్ సెల్, ఎమర్జెన్సీ రెస్పాన్స్ టీమ్, సేఫ్టీ ప్రొటోకాల్ టీమ్, డీఎస్ఆర్ టీమ్ ను ఏర్పాటు చేశామని అధికారులు తెలిపారు.
పోలీస్, జీహెచ్ఎంసీ అధికారులు, సిబ్బందితో కోఆర్డినేట్చేసుకుంటూ ఈ టీమ్స్పనిచేస్తాయని వెల్లడించారు. ప్రధానంగా తాగునీరు కలుషితం కాకుండా చూడనున్నాయి. రోడ్లపై మురుగు పొంగకుండా, భారీవర్షాలకు వరద పోటెత్తితే బాధితులను సురక్షిత ప్రాంతాలకు తరలించనున్నాయి. వాటర్పొల్యూషన్ ఐడెంటిఫికేషన్ యంత్రాలను వీటికి అందుబాటులో ఉంచినట్టు అధికారులు తెలిపారు.
సెంట్రల్ సేఫ్టీ ప్రొటోకాల్ సెల్
మాన్సూన్పనుల పర్యవేక్షణకు వాటర్బోర్డు మెట్రోవాటర్బోర్డు రెండేండ్ల కింద ప్రత్యేకంగా సెంట్రల్ సేఫ్టీ ప్రొటోకాల్ సెల్(సీఎస్ పీఎస్)ను ఏర్పాటు చేసింది. ఇందులో ఆరుగురు సభ్యులు ఉంటారు. చీఫ్ విజిలెన్స్ ఆఫీసర్ ఆధ్వర్యంలో ఈ సెల్పనిచేస్తుంది. ఇందులో పెట్రోలింగ్ వెహికల్, కానిస్టేబుల్, ఇద్దరు హోంగార్డులతోపాటు కమ్యూనికేషన్ సామగ్రి ఉంటుంది.
ఈ సెల్ క్షేత్రస్థాయి సిబ్బంది నుంచి వచ్చే రోజువారిగా వచ్చే ఫిర్యాదులపై ఆడిట్ చేస్తుంది. రిపోర్టులను పర్యవేక్షిస్తుంది. పనులు జరిగే ప్రాంతాల్లో భద్రతా చర్యలు పాటించేలా చూస్తుంది. స్థానికులు నేరుగా ఈ సెల్కు ఫిర్యాదు చేయొచ్చు. డివిజన్ఆఫీసులో చీఫ్ సేఫ్టీ ప్రోటోకాల్ ఆఫీసర్ అందుబాటులో ఉంటారు.
ఎమర్జెన్సీ రెస్పాన్స్ టీమ్
ఎమర్జెన్సీ రెస్పాన్స్ టీమ్స్(ఈఆర్ డీ) వర్షా కాలంలో కీలకంగా వ్యవహరించనుంది. వానల టైంలో రోడ్లపై మురుగు, వర్షపు నీరు కలిసి ఓవర్ఫ్లో సహాయక చర్యలు చేపట్టనుంది. సమాచారం అందిన వెంటనే వరద ముంపు ప్రాంతానికి చేరుకుని చర్యలు చేపడుతుంది. ఆయా ప్రాంతాల్లోని పోలీసులు, జీహెచ్ఎంసీ డిజాస్టర్ మేనేజ్ మెంట్ టీమ్ తో కలిసి సమన్వయం పనిచేస్తుంది.
సేఫ్టీ ప్రొటోకాల్ టీమ్
ఇది మెట్రోవాటర్బోర్డుకు సంబంధించిన ప్రత్యేక భద్రతా బృందం. ఆయా ప్రాంతాల్లో బోర్డు నిర్వహించే పనులను, పని ప్రదేశాల్లో భద్రతా చర్యలు పాటిస్తున్నారా లేదా అనే విషయాన్ని పరిశీలిస్తుంది. అన్ని ఓ అండ్ ఎం డివిజన్ల పరిధిలో జరుగుతున్న సైట్లలో తనిఖీలు చేపడుతుంది. పని జరిగే ప్రదేశాల్లో సూచికలు ఏర్పాటు మొదలుకుని జియో ట్యాగింగ్ వరకు పర్యవేక్షిస్తుంది. అధికారులు డివిజన్ కు ఒక టీమ్ను కేటాయించారు.
డీఎస్ఆర్ టీమ్
డీఎస్ఆర్ టీమ్లోని సభ్యులు వర్షాలు కురుస్తున్న సమయంలో రోడ్లపైకి వస్తారు. జీహెచ్ఎంసీ గుర్తించిన వాటర్లాగింగ్ పాయింట్స్, ప్రమాదకర మ్యాన్ హోల్స్ వద్ద అందుబాటులో ఉంటారు. వర్షా కాలమంతా రోజూ క్షేత్రస్థాయిలో పర్యటిస్తారు. డైలీ సిచువేషన్ రిపోర్టు(డీఎస్ఆర్)ను తయారు చేసి ఉన్నతాధికారులకు పంపిస్తారు. అలాగే వాటర్ లాగింగ్ పాయింట్ వద్ద ఒక వ్యక్తిని నియమించి పరిస్థితిని పర్యవేక్షించనున్నారు.
